Otto Jerimiassen: - Politeeqarfinni pissutsit ajorput!
Siumut sinnerlugu inatsisartuni ilaasortap, Otto Jeremiassenip nunatsinni politeeqarfinni pissutsit ernumanartoqartippai.
Nunatsinni politeeqarneq Naalagaaffimmit aqunneqarpoq, nunatsinnullu nuunneqartinnagu pissutsit aaqqeqqaartariaqagassat arliliupput, Otto Jeremiassen naalakkersuisunut apeqquteqaateqarnermini allappoq.
Aaqqitassat nukingernartut ilagaat politeeqarfiit, Qaqortumilu politeeqarfik assersuutigineqarpoq.
Suliffeqarfinni avatangiisinut inatsimmut Qaqortumi politeeqarfik tulluutinngilluinnartoq pillugu qanoq iliuuseqarfigineqarniarnersoq, Otto Jeremiassenip naalakkersuisunut apeqquteqaatigaa.
Politeeqarfik 1951-imi atorneqalerpoq, sulilu allanngortinneqarani inunnit aqqaneq-marlunnit suliffigineqarpoq.
Allaffeerannguami ataatsimi inuit sisamat qimmillu pingasut isersimasarput, ineeqqamilu allami 9 kvadratmeterisut angitigisumi allaffimmiut marluk sulisarlutik.
Politiit sinerissami atugaasa ajorluinnarnerat tunuliaqutaralugit, Otto Jeremiassen naalakkersuisunut apeqquteqaatigaa Inatsiseqarnermut naalakkersuisoq Danmarkimi Inatsiseqarnermut ministerimik oqaloqateqalersaarnersoq, pissutsit atoruminarnerulernissaat anguniarlugu, taamaassappallu qanoq iliornikkut tamanna aaqqinniarneqarnersoq.
