Ostermannip inuiaqatigiinnut qanoq akeqarsimanera IA-p paaserusuppaa

Maannakkulli Aqqaluaq B. Egede IA-meersoq § 37 naapertorlugu arlalippassuarnik apeqquteqarpat tamakkua akineqartussanngorput. Apeqqutit ilaat imatut saqqummiunneqarpoq ”Aalisarneq pillugu Naalakkersuisup Naalakkersuisut siulittaasuata najugaqataanik siunnersortissamisut atorfinitsitsinera sutigut qanorlu annertutigisunik aningaasartuutigineqartussaassava”.

Taassuma saniatigut suli arfinilinnik apeqquteqarpoq, ilaatigut kaajallaasitaq nutaaq naapertorlugu immikkut ittumik siunnersortit qanoq atorfinitsinneqartarnissaat paaserusunneqarluni.

-Naalakkersuisunut ilaasortat immikkut ittumik siunnersortit atorfinitsinneqartarnissaat aningaasarsiaqartinnissaallu pillugit kaajallaasitami 2014-imi januaarip 1-anniit atuutilertumi allassimavoq, suliffimmit soraarnermi inatsisitigut sulisitsisut atorfillillu pillugit Inatsisartut inatsisaat malinneqassasoq. Tamanna kaajallaasitami § 10 imm. 2-mi allassimavoq. Aalajangersakkami tassani kiisalu Inatsisartut inatsisaanni aalajangersakkat taaneqarreersut paasinerlunneqarsinnaammata, aningaasartuutit suut qanorlu annertutigisut Namminersorlutik Oqartussanut akiligassanngortinneqassanersut paaserusunneqarpoq, apeqqutiminut tunngavilersuutitut Aqqaluaq B. Egede taamatut allappoq.