Oslomi akerliussutsimik aamma takutitsisoqarpoq

marsip 05-at 2007 15:25

Inuusuttut Københavnimi ornittagaata piiarneqarneranut akerliuneq Oslomut ullumi annguppoq, tassa akerliussutsimik takutitsisut 150-it missaanniittut danskit Oslomi aallartitaqarfianut ullumi arfernup qeqqata missaani ornigummata. Taama allappoq Norgemi aviisi, Verdens Gang.

Norgemi aviisi alla, Dagbladet, naapertorlugu, akerliussutsimik takutitsisut nilliarrassimapput: ”Aallartitaqarfik piiarsiuk, Inuusuttut ornittagaat taamaaliornagu.”

Politiit gasimik qulliliornartumik atuisariaqarsimapput, taamalimmallu akerliussutsimik takutitsisut qimagussulerput.

Inuusuttut ornittagaata piiarneqarnera ingerlarusaarpoq – affaata missaa maanna peerneqarsimalererluni.

Suliffeqarfiit illumik piiaasut atortui ullup ingerlanerani aserorteriffigineqaqattaarput, sulisullu sioorasaarneqartarlutik.

Suliffeqarfiit suuneri oqarasuaatikkut angallattakkakkut SMS-erluni nassiussuunneqartarput, suliffeqarfiillu arlallit taamaatiinnarniarlutik eqqarsaatigaat, sulisumik peqqarniisaarfigineqarnissaat annnilaanngatigigamikku.