Oscarinnattut KNR-ikkut unnuaru malinnaavigikkit
Filminik nunarsuaq tamakkerlugu soqutigisallit unnugu fjernsynerlualaavissagunarput, filmiliullammaat, isiginnaartitsillammaat allarpassuillu Oscarinnatsinneqarnerat aallakaatinneqartussaammat.
Oscarinnatsitsineq, Los Angelesimi pisussaq, tamaat KNR-TV-p tassuugu nalunaaqutaq arfineq-marluniit unnuaru marluk missaata tungaanut aallakaatissavaa.
Kalaallit isitsinnit isigalugu avataarsualiarnermik amerikamiut filmiliaat, Gravity, qiimmattaatigissagunarparput.
Avataarsualiartaammi aquttut marluk filmiliarineqarput, avataarsualiartaat aqqutaani ajutoormat, inuttaasut, George Clooney, aamma Sandra Bullock, ilungersoqalutik Nunarsuatsinnut uterniarsaripput.
Kalaalerpaluttumut saannera uaniippoq, Sandra Bullock VHF-radio atorlugu kalaallimut sikumi aalisartumut attaveqariataarnera. Qimmii tusaaneqarsinnaapput, Juaaka radiokkut erinarsortoq tusaaneqarsinnaalluni, Sandra Bullockillu aamma piniartup minutsini tallimani nuanneqisumik attaveqaleriasaarnerat misigisassaavoq attortinnartoq. Piniartumut inuttaavoq Orto Ignatiussen, taanna Tuukkakkunni isiginnaartitsisartutut Fjaltringimi naammassinikuuvoq.
Sandra Bullockip qimmitut sikumiittutut "miaggoorneralusooq" filmiliaavoq kusanarluinnartoq. Filmili Oscarinnatsinneqassanersoq unnugu paasinarsiumaarpoq.
Qallunaat filmiliaat pingasut Oscarinnattussatut aamma innersuunneqarnikuupput - ullumikkullu ulloq Naalagaaffeqatigiinnermut immaqa nuannersuussasoq.
