Oscarinnattussatut innersuussaq najuuteqqusaajunnaarsitaavoq

Filmiliortoq taanna Frankrigimeersoq nersornaaserneqartussani siullerpaalluni ilaasinnaajunnaarsitaassaaq. Taamatut mattunneqarneranut pissutaavoq filmimiliortartup taassuma Amerikami filimiliornermik ilinniarfimmeersut nersornaasiinermik aalajangiisussaasut mailikkut allaffigalugit sunnerniarsimammagit, nutaarsiassaqartitsivimmi Ritzauimi taama allaaserinnittoqarpoq.

Chartier-ip mailikkut nassiussamini aalajangiisussat filmiliaminik "The Hurt Locker"-imik toqqaaqqullugit kajumissaarpai, filmiliarsuarmit 500 millionit dollarsinik akilimmit "Avatar"-imit pitsaanerunerarlugu.

Naak Nicolas Chartier nutaamik mailikkut nassiussamini utoqqatsereeraluartoq, filmiliorfiup isummani allanngortikkusunngilaa.

- Malittarisassat najoqqutaralugit sunniiniarnissaq imaluunniit filmit unammisat pitsaanngitsumik oqaluuserinissaat inerteqqutaavoq, filminik ilinniarfimmit tusagassiuutinut nalunaarummi ilaatigut taama allapput.

Filmi qulingiluanik oscarinnattussatut innersuussutigineqarpoq, ilaatigut filmilianit pitsaanerpaatut aamma pitsaanerpaamik ilitsersuisoqartutut toqqarniarneqarluni.