Oscarinik agguaaneq

Filmi pissanganartuliaq, pinerluttulersaarut aattaqaqisoq, "The Departed" nersornaatinik Oscarinik Hollywoodimi agguaasoqarmat, ukiup filmitsialaatut toqqarneqarpoq, ilitsersuisartorlu, nunarsuaq tamakkerlugu nalunnginneqarluartoq, amerikamiu, Martin Scorsese ilitsersuillammattut pernaammik Oscarinnappoq.

Filmimi pingaarnertut inuttaapput Leonardo DiCaprio, Matt Damon aamma Jack Nicholson, filmimilu malittarineqarsinnaavoq pinerluttorsiortup Bostonimi mafianut akornusiiniarnera pissanganarluinnartoq.

Isiginnaartitsillammattut toqqagaapput tuluk arnaq, Helen Mirren, taanna filmimi ”The Queen”-imi Dronning Elisabethiusaarpoq, aamma Forest Whitaker filmimi ”The Last King of Scotland”-imi angutini inuttatut pikkorinnerpaatut toqqagaavoq, Forest Whitaker filmimi tassani Idi Aminiusaarpoq, tassa Ugandami kisermaassilluni naalakkersisuusimasutut inuttaalluni.

Aamma USA-mi præsidentip tullersortigisimasaa, præsidentimullu qinigassanngortissimasoq, Al Gore, nersornaatisivoq, filmimi pisimasuinnik tunngavilimmi, ”En ubekvem sandhed”-imi silaannaap allanngoriartorneranut tunngassuteqartumi, filmilioqataasimasutut.

Danskini innersuunneqaraluarput Susanne Bier aamma Søren Pilmark, taakkuli arlaannaalluunniit Oscarinnanngilaq.