Osama Bin Laden-ip nassaarineqarluni tigusarineqarnissaanut, paasissutissanik tunniussisinnaasut 27 million dollarinik akissarsissasut neriorsuutigineqartaraluartoq, Osama bin Laden suli nassaarineqanngilaq.
Ukiut tallimat qaangiupput, New York-imi illorsuit World Trade Centerit qaartinneqarmata, taamanikkullu inuit 2749-t ajunaarput.
Illorsuarnik qaartitsinissanut pilersaarusiornerni Osama bin Laden siuttuusimasutut pisuutinneqarpoq. Illorsuarnik qaartitsinissamik pilersaarusioqataasimasutut pisuutinneqarlutik tigusarineqarsimasunut ilaavoq, Al-Qaeda-mi siuttut ilaat, Khalid Sheik Mahammad. Taanna Pakistanimi ukiut pingasut matuma siorna tigusarineqarpoq, CIA-llu paarnaarussiviisa ilaannut mattunneqarluni.
USA maannakkut nalunaarpoq, Khalid Sheik Mahammad, Cuba-mi paarnaarussiviit tusaamanerlugaaqisut ilaannut Guantanamo-base-mut nuutinneqassasoq.