Osama bin Laden tutsiuteqqippoq

Osama Bin Laden videokkut saqqummeqqaarpoq novemberip ulluisa qulingiluaanni 2001-imi.

Saudi Arabiamiup pisoorsuup ernerata Afganistanimiunit taamanikkut nuannaarutigineqaqisup oqariartuutaa tassaavoq;

USA-mi qaammatit marluk matuma siornai aseruinerujussuit inuppassuarnillu inuartarinninnerit ilimagisaminiit iluatsilluarnerusimasut.

Septemberip ulluisa qulinganni 2003-mi Osama Bin Landen saqqummeqqippoq.

Taamani tullersortini ilagai ajaappisserluni nunami ujaraannaasumi innaarsorasaaqisumi.

Kingullermiugallartorlu saqqummeqqippoq oktoberip ulluisa 29-anni 2004-mi. Tassani amerikamiut præsidentinngorniunneranni piumasaqaateqarpoq sioorasaaralunilu.

al-Qaidakkut nittartagaanni a sahaap-imik taaguutilimmi, isumaqartoq ”nuiaq” sheiken, liiveq, Osama Bin Laden, nunarsuarmioqatigiinnut videomik immiussakkut saqqummeqqinniarluni oqariartuuteqarpoq, septemberip aqqarngat sioqqulluguussagunartoq pisussamik.

Ukiut arfinillit qaangiupput Afganistanimiit qimaammat Talibanillu nunami aqutsisuuneranni tikilluaqqusaallunilu sakkutuuminik sungiusaasarpoq, katillugillu 15-iriarluni tutsiuttarpoq, tamatigullu immiussaannartigut tusarliuttarluni.

Ilimagineqartarpoq Tora Borap qaqqarsuini qaarusummi amerikamiunit qaartartunik saassutarineqarnermini toqutaasimassasoq imaluunniit tartuluuteqarluni toqusimassasoq.

Sulili uumagunarpoq.

Præsident Buship oqaaseqartartuata ullumikkut oqaatigaa, Danmarkimi Tysklandimilu musliiminik ajortumeerinianik tigusarinninnerit septemberip ulluisa aqqarnganni pisimasumut tunngatillugit nalliuttorsiutigineqassasut.

Tamannalu illuatungilerniarlugu Osama Bin Landen nunarsuaq tamakkerlugu saqqummerniarpoq.