Orsussaq 600.000 literi Station Nordiliaanneqartoq

Ukrainimiut timmisartuutaasa assartuutit Ilyushin 76-it ilaata orsussamik 600.000 literimik Pituffimmit Station Nordimut ukiumoortumik assartuinini aallartissimavaa.
Allattoq Karsten Sommer, Jens Thorin
apriilip 08-at 2013 10:22

Timmisartoq taanna danskit illersornissaqarfiata iliuutsimut, Northern Falcon 2013-imik taagukkaminnut, atatillugu attartugaraa.

Taamatut iliuuseqarnermi orsussamik 600.000 literimik Pituffimmi Thule Air basemit Station Nordimut assartuinissaq siunertani pingaarneruvoq.

Aammali Ukrainimiut timmisartorsuat, ukrainimiut sakkutuuinik 29-inik inuttaqartoq, nassuissanik Aalborgimit Station Nordimut nassataqarpoq. Tassa ilaatigut Station Nordimi mittarfik miffiusinnaajuaqqullugu aputaajaatissamik sisamanngormat nassataqarput.

Timmisartorsuaq assartuut Pituffimmit Station Nordimut katillugit 21-riarluni ingerlaaqataassaaq, suliassarlu apriilip naanerani naammassisimassangatinneqarpoq.

Uuliamik Station Nordimit siornaak 2011-imi aprilimi assartorneq Station Nordimi mingutsitserujussuarnermik malitseqarpoq.

Timmisartut orsussaat 22.000 literi tankinut maqitsinermi maangaannaq kuuttoorutigineqarpoq, pinngortitarlu uuliaajarniarlugu saleerujussuartoqarpoq.

Aamma atuaruk