Orsussap qaffannera aningaasarsianik qaffaanavianngilaq

- Aningaasarsiat pisissutigineqarsinnaaneri innarlerneqarput. Taamaattumik ilaasortagut annertuumik kingumik eqqoqqinneqarput. Taamaattumik ilungersunartussaavoq ilaasortatsinnut aningaasarsiat naammattusaarniarnissaat, Sulinermik Inuussutissarsiuteqartut Kattuffiani SIK-mi siulittaasoq, Jess G. Berthelsen oqarpoq

Nunarsuarmi tamani orsussap akiata qaffanerata kinguneranik innaallagiamiit pisiassanut akitsuinissap SIK-miit akissarsianik qaffaanissaq siunniunneqarpoq.

- Aappaagumut isumaqatigiinniarnermi, maannakkut qaffaatit, tassa aningasaarsiat pisissutigineqarsinnaannerat ajorseriarmat, taava soorunami isumaqatigiinniarnermi aappagumut, taakkua anguniarlugit qaffasinnerusumik angusaqarnissarput soorunami siunniupparput, Jess G. Berthelsen oqarpoq nangillunilu:
 
- Taamaattariaqarpoq ilaasortatta aningaasarsiaasa pisissutigineqarsinnaanerat ilorraat tungaanut aallaqqissappat, taava aappaagumut nalinginnaasumiit annertunerusumik tunisisoqartariaqassaaq, Jess G. Berthelsen.

Akinik akitsuinerit sulisitsisut aningaasartuutaat qaffannissaanut kinguneqartussaq Sulisitsisut Peqatigiiffianiit aamma ajuusaarutigineqarpoq. Siulittaasulli Henrik Lethip ilisimavaa, akissarsianik isumaqatigiinniartoqaqqilerpat aningaasarsialinniit qaffaanermik piumasaqaateqartoqassasoq. Kisiannili ilimaginningaa piumasaqaatit tusaaneqarnissaat:

- Aningaasarsiornerup iluani avitseqatigiinnissamut tunngavissaqanngilaq, tunngaviusumillu sulisitsisunut sulisunullu aningaasartuutit annertusiartornerat eqquissaaq. Avataaniillu allannguineq peqquteqarmat immitsinnut taarsiiffigisinnaanngilagut, Henrik Leth oqarpoq.

Akissarsianik isumaqatigiinniarnerit nutaat 2013-mi ingerlanneqassapput.