Orsoq ikummatissiariniarpaat
Pilersaarut Maniitsumi Piorsaavimmi Inerisarneqaleruttortoq tassani pisortaq Bjørn Overgård oqarpoq.
Aallaqqaammut isumagaaluarpoq igitassat taakkua pineqartut inuussutissartaanik uuliaanillu atorluaanissaq. Kisianni inuussutissat protein-it assigiinngitsut amerlasoorpassuummata akilersinnaanngilaq nunaqarfinni laboratorianik laborantinillu pilersitsillunilu atorfinitsitsinissaq.
Taava isuma taanna imaalillugu allanngortipparput, uulia kisimiitilugu atorluarniarneqassasoq, taama nassuiaavoq Bjørn Overgård nangipporlu, uani igitassat tassaasinnaasut immami uumasut perlukuisa aamma immaqa savat orsuisa uuliaat atorluarniarneqarpoq. Taava taakkua maqinneqareersimasut sinnikui qeritillugit qimmeqarfimmiut qimmiinut nerukkaatissatut tunisassiarineqarsinaapput.
Taama isumassarsiap tunngavigaa, Kalaallit Nunaani nunaqarfinni suliffeeraliortoqarsinnaanera nunaqarfimmiunit nammineq aqunneqarsinnaasumik immikkut ilinniagaqartoqartariaqanngilaq, maskiinap qanoq atornissaanik ilitsersuummik malikkuminartuliortoqarsinnaammat.
Bjørn Overgård-p aamma ilisimatitsissutigaa, qulakkiivillugu ilisimanagu, ilumut savat orsuisa uuliamut ikummatissamut akuutissatut atorneqarsinnaanera.Kisianni puisit, arferit aalisakkallu uuliaat kiassarnermut ikummatissamut ajunngivissumik akuutissiarineqarsinnaasoq.
Kiisalu aamma ilisimatitsissutigaa pilersaarut Maniitsumi Inuussutissanik nutaaliorfiup, Piorsaaviup, piginnittui ataatsimeersuarneranni oqaluuserineqartussat ilagigaat.
Piorsaavimmik piginnittut tassaaapput Kalaallit Nunaani Takornariartitsinermi Inuussutissarsiornermilu Siunnersuisoqarfik, Royal Greenland, Arctic Green Food, Maniitsup Kommunia, Greenland Venture aamma Aalisakkanik Tunisassiornermi Ilinniarfik, ATI, tallimanngorpat majip 30-anni ataatsimeersuassapput.
