Orpippassuarni ikuallannerujussuaq suli siaruaappoq

Fort McMurrayimi ullaaq manna siallersimagaluarpoq, ikuallannerujussuarmulli akiuiniarnermut tamanna iluaqutaasimanngilaq.

- Orpippassuarni ikuallannerujussuaqartillugu inneq qaammaterpassuarni siaruatsaaliorneqartarpoq, tamanna nalinginnaavoq, Albertami Qatserisartoqarfimmi sulisoq Chad Morrison ABC Newsimut oqarpoq.

Aamma atuaruk Nuna 1000 kvadratkilometeriusoq ikuallappoq

Kiarujussuarnera anorlerneralu pissutaallutik nuna 2000 hektariusoq una sapaatip akunnera ingerlanerani aserorneqassasoq nunallu sinneranut siaruaassasoq Albertami oqartussaasunit ilimagineqarpoq. 

Inuit 90.000-t tungaannut qimarnguitinneqartut taakku akornanni 12.000-it Fort Mcmurrayip avannaatungaanit uuliaqarfimminngaanniit qimarnguitinneqarput. 

Uuliaqarfimminngaanniit qimarnguititsinerup kinguneranik Canadap uuliamik nioqqutissiornera 25 procentimik appariarsimavoq.