Ornittakkani pujortartarneq

Inuit tamat ornittagaanni sutorniartarfinni assigisaannilu immikkut pujortartarfeqalernissaanik peqqussusioqqusilluni, Inatsisartuni ilaasortap Doris Jakobsen-ip, Siumumeersup siunnersuutaa ullumi oqaluuserineqarpoq. Doris Jakobsenip siunnersuusiornini ima tunngavilersorpaa:

- Isumaqarpunga nunatsinni tupatorneq pillugu peqqussutip nutaap Namminersornerullutik Oqartussanut kommuneqarfinnullu kisimi atortinneqarnera naammanngitsoq, inuk kinaluunniit tupatortanngitsoq pujortarfigitinngikkaluarluni inuit tamat ornittagaanniissinnaasariaqarpoq, Doris Jakobsen tunngavilersorpoq. Oqaatigaa inuiaqatigiit kalaallit nunanut avannarlernut sanilliulluta tupatornikkut qaaffasinnerujussuarmik inissisimasugut.

- Ukiut 20-it matuma siornagut siulittuutigineqarpoq nunatsinni kræfti annertoorujussuarmik atugaalerumaartoq, tamannalumi eqquuppoq, Doris Jakobsen oqarpoq.

Nunatsinni inuit ornissinnaasaanni tupatortarneq imaaliinnarlugu inatsisiliuunneqarsinnaanngitsoq Peqqissutsimut naalakkersuisoq Asii Chemnitz Narup Doris Jakobsen-ip siunnersuutaanut akissuteqarnermini oqarpoq.

- Siullermik oqatigaara Naalakkersuisut isumamut isumaqataalluinnarmata. Innuttaasut ornittagaanni avatangiisit pujortartarfiunngitsut atorfissaqartinneqaqaat. Taamaammat sutorniarfiutillillu oqaloqatigiinnerit siorna novembarimili aallartippagut, isumaqatigiillutalu aasannginnerani naapeqqissalluta, taakkua qanoq isummivissanersut tusaqqaarusukkakku, Asii Chemnitz Narup oqarpoq.

Sutorniartarfiutillit piumassanngikkaluarpata allatut iliuuseqartoqartariaqalissasoq Peqqissutsimut naalakkersuisoq oqarpoq.

- Taava soorunami nalilersoqqissaartariqalissavarput inatsisiliuussinikkut pujortartarfiujunnaarsitsinissamut aqqutissiuussinissaq.

Nuummi kaffisorniartarfimmik piginnittoq Svend Junge radioaviisimut oqarpoq sutorniartarfiummini pujortaqqusiunnaarnissamut piareersimanani, inilli isersimaartarfiit immikkut pujortartarfilersornissaat eqqarsaatigiumallugu.