Ornittagaq Qiperoq matunissaminut piareersaqqippoq

Kalaallit ornittagaat Vesterbromiittoq Qiperoq, aningaasaliisoqanngippat januaarimi matusariaqassaaq. Sulisut soraarsinneqareerput atuisullu nalunaarfigineqareerlutik.

Naak siunissaq qaamavallaanngikkaluartoq Qiperormi isersimasut qiimapput. Sannavimmi Jens Pavia Møller Ulf Mørchilu qiperuipput.

- Qiperup matunissaa pitsaasuunngilaq. Angerlarsimaffeqanngitsorpaasuit maani naapitarpakka. Taamaammat uggornassaaq matuneqassappat, Jens Pavia Møller oqarpoq.

- Angerlarsimaffinni nammineq sannaveqarpunga, taamaakkaluartoq matunissaanut piareersartoqarnera immaqalu atorunnaarsitsisoqarnissaa ajuusaarnartippara, mannami inunnut immaqa ingerlalluarpallaanngitsunut pitsaasuuvoq, aammalumi uatsinnut, Ulf Mørch oqarpoq.

Inuit 15-it missaat ullut tamaasa Qiperormut Vesterbromiittumiittumut isertarput. Ornittakkap pisortaa, Ane Louise Lynge, isumaqarparpoq Qiperoq atuisut saaffissaarutissasut.

- Ikiorneqarnissaq ilitsersorneqarnissarlu maanngaanniit pisartakkatik pisinnaajunnaassavaat. Qiperoq immikkuullarissuuvoq, atuisummi sunut tamanut akuutinneqartarput, tassuunalu imminut ataqqeqatigiinnissat aammalu saanngiiffiit nukittoqqutillu ilinniarneqartarlutik.

Kalaallit folketingimut ilaasortaartitaasa marluusut Danmarkimi kalaallit illuutaasa isumaginninnikkut suliniutaasa aningaasanut inatsimmut ilanngunneqarnissaat danskit naalakkersuisuinut noqqaassutigisimavaat.

- Suliniut matuneqartarlutillu ammaqqinneqartarnerat, aammalu ukiut tamaasa ukiup naanerata kingorna ingerlaqqissinnaassanerlutik nalornissuteqartarnerat ajorluinnarpoq, Sara Olsvig (IA) oqarpoq.

Ilaatigut Qiperup matuneqarnissaa Doris Jakobsenip aamma naammaginngilluinnarpaa.

- Piffissamut ungasinnerusumut aningaasaliinani ukiumit ukiumut aningaasaliisoqartarnera ernumanartoqarpallaaqaaq. Kalaallit illuutaat ilarpassui aningaasaliissutinik annaasaqaratarsinnaapput.

Nunap sinnerani isumaginninnikkut suliniutit kalaallit illuutaannit ingerlanneqartut aamma matuneqaratarsinnaapput. Ornittagaq Tamassa Aalborgimiittoq Qiperoq assingalugu satspuljemit aningaasaliissutinik nunguutsissaaq, aamma Odensemi, Vejlemi Esbjergimilu isumaginninnikkut suliniutit taamatut inissisimapput, Aarhusimilu suliassaqartitsiniarnikkut suliniut 2014-ip naanissaata tungaanut aningaasalersugaalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat