Orlap imaannaanngitsuliaa nutaaq: Qaammatip ataatsip ingerlanerani 1.000 kilometeri arpappaa

Orla Isaksen Mølgaard siorna qaammatip ataatsip ingerlanerani 600 kilometeri arpappoq. Ukiormannalu imminut qaangeriarpoq.

Orla Isaksen Mølgaard maajip ingerlanerani Nuummiit Upernaviup avannaanut isorartoqataanik arpappoq.

Kisitsisitalerlugu qaammatip ataatsip ingerlanerani 1.000 kilometerit arpareerlugu Nuutoqqamut ippassaq unnukkut apuuppoq tassanilu ilaquttat ikinngutaasullu erfalasuaralisarlutik nuannaarlutik nilliapput.

Orla Isaksen Mølgaardip apuunninni nuannaarutigalugu arpattartoqatini Mika Lyberth qaammatip ataatsip ingerlanerani 500 kilometeri arpattoq imaanut nilleqisumut pisseqatigivaa.

- 1.000 kilometeri naammassiartornerani oqiliartuinnavippunga, Orla Isaksen Mølgaard Nuutoqqamut apuuteriitsiarluni KNRip naapimmani oqarpoq.

- Arpakatakkama aamma qaammallu una sakkortulluni.

AAMMA ATUARUK Imaannaanngitsuliortoq: Orla maajimi 600 kilometeri arpappoq

Siorna maajip qaammataani arpataa 600 kilometeri Nuummiit Ilulissat avannaanut isorartussuseqarpoq. Ukiormanna anguniakkani annertusingaatsiarpaa.

- Ilimagisanniit oqinaarneruara. Qujanartumik aamma ingerlaarninni ippigisaqannginnama. Kisianni eqqarsartaatsikkut assut sakkortuvoq, Orla Isaksen Mølgaard oqaluttuarpoq.

Arpattartorpassuit isorartuumut arpannermi ungasigilersuuillutik eqqarsartaatsikkut tamaviaartarput. Orla Isaksen Mølgaardillu arpataa immikkuullarissumik isorartoqaaq.

Aqqutaani ungasigilersuunngiliuk?

- 1.000 kilometeri anguniaralugu eqqarsaatiginaversaartarpara. Ullormut anguniakkakka eqqarsaatiginerusarpakka utaqqikatannaversaarlungalu, Orla Isaksen Mølgaard oqarpoq.

600 kilometer imaluunniit 1.000 kilometer arpaqqikkusunnerlugit eqqaasaqanngilaq. Ullulligooq tulliuttut nissuni qasuersaartinniarpai.