Peqqinnissaqarfinni taaguusersuutit atorneqarneri paatsuunganartoqannginnissaat pillugit, Oqaasileriffik suleqatigalugu Peqqinnissaqarfik atuakkamik ullumi saqqummersitsivoq.
Dronning Ingridillu napparsimmavissuani oqalutsit nakorsanullu allatsit atuagaq iluaralugu unnersiorput.
Judth Kuitse Nielsen nakorsamut allattaavoq, ulluinnarnilu sulinermini taaguusersuutit ilaatigut eqqaamajuminaassinnaasut atortuartarlugit.
Peqqinnissaqarfinni taaguusersuutit nutsernialeraangamigit orbogi nalinginnaasoq siornatigut atortarsimavaa, maannali tamanna pisariaaruppoq, peqqinnissaqarfinnimi taaguusersuutit atuaganngorlugit immikkut saqqummersinneqaqqammeramik, inuttaata iluareqisaannik: - Taaguusersuutit uani ersarilluinnartumik allattorsimapput, taamaattumillu ersarinnerusumik nutserisinnaallerluta, nassuiaanissamullu piffissaq aamma annikinnerulissaaq, nakorsamut allatsi Judith Kuitse Nielsen oqarpoq. Taamatuttaaq oqalutsi Kathrine Kristiansen unnersiorpoq.
Atuakkami taaguusersuutit qallunaatuumiit kalaallisuunngortinneqarsimapput, taaguusersuutillu latinerisut allassimasut aamma nutserneqarsimallutik: - Assersuutigalugu nakorsaq oqarsinnaavoq inuk cystoskopi-mik taaneqartartumik misissorneqassasoq. Taava atuakkami uani takusinnaavara nakasummik misissuineq ingerlanneqassasoq, Dronning Ingridip napparsimmavissuani oqalutsi Kathrine Kristiansen oqarpoq, nangillunilu: - Siornatigut imaaliortaraluarpugut nakorsap oqaasii malillugit eqqaamaniaannartarlugit taakku taaguutit, massakkullu tassa atuagaq taanna qissimillattaaginnarsinnaanngussavarput, Kathrine Kristiansen oqarpoq.
