Oratank alinneqarpoq

Oratank itsinermini alinneqarpoq taannalu umiarsuup immassutigaa. Immakkaluartorli umiarsuup imaarsaatai angummassinnaapput.

- Tamatuma kinguneranik Oratank amutsivimmukartaraiqarpoq. Kalaallit Nunaannili amutsiviviit mikivallaarput taama annertutigisumik suliaqarnissaminnut. Taamaammat maanna misissorparput amutsivimmi sorlermi suliarineqassanersoq, umiarsuarmik piginnittuniit Lars H. Simonsen KNR-imut oqarpoq.

Aqqartartut umiarsuup itsernga ippassaq misissorpaat marlunngornerup ullaassaani ikkarlikkaluareersoq. Umiarsuaq nammineq kaanngarpoq taamaattorli ikkarlikkaluarnerup kinguneranik alinneqalersimavoq. Amutsivimmi angisuumi alinneq taanna suliarineqartussaavoq.

Polar Oilip uuliamik assartuut Orsila avannaanukartippaa Oratankip ajutoornerata kinguneranik. Umiarsuarmillu piginnittut M.H. Simonsenikkut pisussaapput umiarsuarmut taartaagallartussamik nassaarnissamut.

- Umiarsuaatitta ilaat piareersarparput Kalaallit Nunaaliartissallugu. Sapaatip akunnera ataaseq missaliorlugu ingerlareeruni apuussinnaassaaq, Lars H. Simonsen oqarpoq.

Suli nalunarpoq Oratank qaqugu pisarnermisut angalaqqilersinnaanersoq.