Orasila pillugu tallimanngormat killisiuisoqarpoq
Aamma ajunaartup aappaa umiarsuarmi taamaallaat ulluni tallimani inuttaasimavoq. Tamakku paasineqarput tallimanngormat imarsiornermut inatsit tunngavigalugu Qaqortumi killisiuisoqarmat, Sermitsiap nittartagaani taama allaaserinnittoqarpoq.
Umiarsuup naalagaata Thomas Christensenip killisiorneqarneratigut killisiuineq aallartinneqarpoq. Taassuma Saarlumut tikinnertik aamma slangenik nunamukaassuinermi suleriaaserisartagartik sukumiisumik nassuiaatigaa.
Ilanngullugu nassuiaavoq, ajunaarnerup nalaani qaqutigoortumik silagissorsuummat, imaassinnaasoq angutit ajunaartut marluk puttaqusinngitsoorsimasut, tassami puttaqutit qeratanertik pissutigalugu sulinermi aalaniarnermut akornutaasarmata. Umiarsuup naalagaata taamaalilluni nassuerutigaa, uuliamut slangenik nunamukaassuinermi atallaarsuarnik annanniutinik aamma puttaqutinik aaqanngitsunik atuinissamut tunngatillugu 100 procentimik aalajangersimasunik maleruagassaqaratik.
Naak umiarsuaatileqatigiit oqaaseqartitaata Jess Myrthup Radioaviisimut ataasinngormat oqaatigigaluaraa, angutit ajunaartut marluk Orasilami sulinermik misilittagaqarluartuusut, killisiuinermi tallimanngormat paasinarsivoq, 18-inik ukiulik ajunaartup aapparisaa, Orasilami ulluni tallimaannarni inuttaasimasoq.
Qanimut isiginnittup aamma umiarsuup naalagaata killisiuinermi oqaatigaat, umiatsiaaqqap sukkavallaarnera aamma slangep sukattoorneratigut umiatsiaaqqap nusutsilluni kinngunera ajunaarnermut pissutaagunartoq.
