Orasila kilisaatit kaanngartippaat
Sakkutuut alapernaarsuutaat "Knud Rasmussen" aamma Royal Arctic Linep assartuutaa "Arina Arctica" ikiuunniarlutik taqqavaniikkaluarput, itsinertuallaarnertilli pillugu ikkarluit akornannut pulasinnaasimanatik.
Ikkarliffiup imartaa ima ikkatsigisimavoq allaat alapernaarsuut assartuullu kalitsiniarniarlutik pulasinnaasimanatik. Politiilli angallataat Sisak III kilitaateeqqallu pingasut ikiortigalugit Orasila unnuaq kaanngartinneqarpoq.
Ikkarleqqasoq uuliakuulissagaluarpat saliinissamut qatserisartut ulloq unnuarlu ataaseq piareersimatinneqarput.
Politiit angallataannut qatserisartut arfineq-pingasuullutik ilaanertik pillugu Qaqortumi qatserisartut pisortaata tullersortaa Emanuel Møller ima oqaluttuarpoq:
- Soorunami eqqissiallaqaanga suut tamarmik ajunngitsumik naammassimmata. Orasila Qaqortumut tikimmat toqqissiallannaqaaq, oqarluttuarpoq.
Qatserisartut arfininngormalli ullaassakkut sisamat missaannili uuliarluertoqassagaluarpat siaruatsaaliuinissamut mingutsitsinnginnissamullu sillimatitaasimapput.
- Umiarsuaq ikkarlummut qaqeqqasoq unnuaq ulimmat politiit angallataata kilisaateeqqallu kaanngartippaat. Uagut atortuutigut Orasilamiitikkatsigit qanoq pisoqaratarnissaanut piareersimasimavugut, nassuiaavoq.
Namminersornerullutik Oqartussat akuersinerisigut usiisa - gasoliep, timmisartut orsussaata uuliallu - 1.764 tonsiusut ilaat gasolie 163 tonsi kalillugu kaanngartinnginnerani umiarsuarmut allamut maqinneqaqqaarpoq. Allalu timmisartut orsussaat 41 tonsi imaanut maqiinnarneqarluni.
- Orsussamik maqitsiffik ullumi ornittussaagaluarparput, silarlunnerali pillugu aqagumut alakkarnissaa kinguartinneqarpoq, Emanuel Møller nassuiaavoq.
