Assi: KNR

Nunatta nakorsaanera: Oquup ajornartorsiutaanera ingasaassaavoq

Oquk peqqissutsimut sunniuteqarsinnaavoq, Nunatsinnili nakorsaanerup ajornartorsiut ingasaanneqarsoraa. Tamatumalu saniatigut inuit oquttumi najugaqartut napparsimanerannut allanik nassuiaatissaqarsinnaanerarpaa.

Nunatsinni inissiarpassuit oqoqarput. Qanorli ajornartorsiutaatiginerat oqallisigineqarsinnaavoq.

Nunattami nakorsaanera, Henrik Hansen aperigaanni taassuma ajornartorsiut ingasaanneqarsoraa.

- Aap, taama isumaqarpunga. Nunap immikkoortuini assigiinngissuteqarsinnaalluarpoq, ajornartorsiutaaneratali piviusumik annertussusaa eqqarsaatigalugu Nunatsinni oqallisigineqarpallaarsoraara, Henrik Hansen oqarpoq.

Oquk inigisanni ima pinaveersaartissinnaavat:

  • Silaannarissaaneq, pingaartumik uffarfimmi igaffimmilu silaannarmi aalartitsiffiunerpaasartuni.
  • Iganermi aalamik aniatitsivik atoruk.
  • Errortanik silami panersiineq imaluunniit panersiivik aalartitsisanngitsoq aalamilluunniit aniatitsisartoq. Atisanik inimi panersiinak.
  • Inigisap kiassarnera naammattoq (minnerpaami 18-20 gradit).
  • Eqqiaaneq.

Tigusiffik: Peqqinnissaq pillugu aqutsisoqarfik.

Oquk inuit ilaannut sunniuteqartartoq

Ajornartorsiutip annertussusaa ataasiuvoq, oquulli inunnut qanoq sunniuteqartarnera allaavoq, nunatsinnilu nakorsaanerup oqarnera naapertorlugu tamanna aamma oqallisigineqarsinnaavoq.

Isugutak oqullu sapikkanut, polleninik sapigaqarnermut, issanngusarnermut, torluup puannut atassutaasigut nuaqarnermut anersaartorfiilluunniit aqqutaatigut allanut nappaatinut ajornerulersitsisinnaasoq, peqqinnissaq pillugu aqutsisoqarfiup 2009-mi misissuinerata inerniliuppaa. Taamaammat oquk nappaatinik pilersitsisarnersoq uppernarsineqanngilaq, nappaatinulli ajornarnerulersitsisinnaasoq.

- Oquup nappaateqalersitsisartutut oqariartuutigineqartarnera ajuusaarutigaarput, tamanna uppernarsarneqarnikuunngimmat. Inuit nappaateqareersut oqummik sunnerneqaraangamik ilaatigut peqqiinnerulertarput, nunatsinni nakorsaaneq oqarpoq.

Oquk niaqorlutsisinnaavoq, uissanngutitsisinnaavoq, ungillerititsisinnaavoq amerlutsitsisinnaallunilu. Nunatsinnili nakorsaanerup inissiat isugutattut inissianit oqoqartunit ajornerusut erseqqissaatigaa.

Isugutattut taamaallaat oqoqalertarput. Inissiami oqoqartumiikkuit tamanna inissiavit isugutanneranut takussusiisinnaavoq.

Oquk sumiluunniit pinngortitamiittarpoq - aamma Nunatsinni. Assigiinngitsorpassuarnik oqoqarpoq, assigiinngitsorpassuarnik sunniuteqartartunik. Ilaat nakorsaammik penicilliniliornermi atorneqartarput, ilaat viiniliornermi ilaallu inunnut sunniuteqapilussinnaasunik toqunartuliornermut atorneqartarlutik, amerlanerilli tunngaviusumik uloriananngillat.

Inigisat oqoqareerpa?

  • Isugutanneranut patsisaasoq paasiniariarlugu iliuuseqarfigiuk.
  • Oquup naaffii ersittut asallugit salikkit siaruaatinnginnissaanullu qaqorsaammik naleqquttumik atuillutik.
  • Inimi isugutattumi oqoqartumi sininnaveersaarit.

Tigusiffik: Peqqinnissaq pillugu aqutsisoqarfik.

Patsisaasut allat

Inuit ilaat oqummik sunnerneqartartut, Henrik Hansenip erseqqissaatigaa, oqulli kisiat patsisaasutut isigineqassannginnerarpaa.

Inissiami oqoqartumi najugaqarlutit tamanna peqqinnernut sunniuteqartoq malugigukku tamatuma oqummik pissuteqannginneranut nassuiaatissaqarsinnaavoq.

- Peqqinneq pillugu misissuinermi nutaami inuiaqatigiinni equngasumik inissisimasoqarnera takoqqissinnaavarput, assersuutigalugu pujortartarnermut peqqinnissamullu allanut tunngassuteqartunut atatillugu. Taamaammat suna siulliunersoq oqallisigineqarsinnaavoq, pissutigalugu inissiani ajornerpaani najugaqartut nunatsinni peqqinnissaminnik ajornartorsiuteqarnerusarput tamatumunngalu oquk ilaatigut patsisaatinneqartarluni, Henrik Hansen oqarpoq nangillunilu:

- Inuit inissiani taamaattuni najugaqartut taama ajornartorsiuteqartarnerat isumaqatigilluinnarpara oqummillu taakku ilaatigut pissuteqarnerarneqartarput. Peqqinnissamili ajornartorsiutaasut assigiinngitsorpassuupput, patsisaasorlu taaneqartarpoq, imaassinnaavorli kukkusumik pisuutitsisoqartoq, peqqinnissamullu ajornartorsiuteqartitsisut soorlu pujortartarneq allallu ingerlatiinnaraanni oquttumiikkunnaaraluarluni peqqinnerminni ajornartorsiutigisaat aaqqiivigineqarneq ajorput.

Nunatsinni inissiat qanoq amerlatigisut oqoqarnersut ataatsimoortumik nalunaarsugaatigineqanngilaq, Namminersorlutik Oqartussalli oquttunik suliaqarnissamut 20 millionit koruuninik ukioq manna immikkoortitsipput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat