Oqummik misissuinissaq akisoorujussuuvoq

105 millionit koruunit. Inigisani Namminersorlutik Oqartussanit pigineqartuni oquup pinngorarfiisa misissornissaat tassa taama akeqassaaq. Ineqarnermut naalakkersuisoq, Jens B. Frederiksen, taama ilisimatitsivoq.
juulip 23-at 2010 14:39

Inuit Ataqatigiit sinnerlugit Inatsisartunut ilaasortap, Naaja Nathanielsenip, paragraf 36 tunngavigalugu apeqqutaanut, Ineqarnermut naalakkersuisoq, Jens B. Frederiksen, taama akissuteqarpoq.

Inigisap sannaa, ineqartup pissusaa, taakkuluunniit kattullugit, oquup pinngorneranut pissutaasinnaapput. Inigisani oquup pinngorfiinik misissuiniaraanni inigisap ukiumi ataatsimi nakkutigilluaqqissaarnissaa taamaammat pisariaqarpoq.

Inigisaq ataaseq ukioq naallugu nakkutigissagaanni ukiumut 15.000 koruunit missaannik akeqassaaq. Oquullu pinngorarfii tamaasa piiarnissaasa aningaasartassai qanoq amerlatigissanersut tassani ilaanngillalluunniit, Jens B. Frederiksen nassuiaavoq.

Erseqqissaatigaa oqoqarnermik ajornartorsiutit Naalakkersuisut kisimik aaqqiivigisinnaanngikkaat:

- Inigisani najugaqartut oquup pinngortinnaveersaarnissaanut Naalakkersuisut siunertaannut ikorfartuissallutik qaninnerpaapput, Ineqarnermut naalakkersuisoq oqarpoq.

Inissiat attartortittakkat 7.000-ingajaat Namminersorlutik Oqartussat pigaat.