Oquk: Ukiukkut igalaat ammarlugit sulisarput
- Ukiukkut oqussunni ingasatsikkaangat isersimanissaq ajornarsiusattarpoq. Igalaat ammarlugit sulisarpugut anorleraangallu qarlippaalerluta kavaajalerlutalu sulisarpugut, Vittus Sanimuínaq taama oqarpoq taassumalu oqaatigaa tipi ajorluinnaraangat angerlaannartariaqartarlutik.
Taanna aamma oqarpoq Kommuneqarfik Sermersooq tamanna pillugu ilisimatinneqareersimavoq kommunelu nalunaarsimavoq nutaamik allaffiliornissaq akissaqartinneqanngitsoq.
Ilanngullugu oqaatigaa sulisut peqqissaasumik oqaloqateqarsimasut suliarlu sullivinnik nakkutilliisoqarfimmut nassiunneqareersimasoq
- Tamatuma kingorna suli susoqaqqinngilaq, oqarpoq nangillunilu.
- Eqqarsariaallannarpoq. Namminersorlutik Oqartussat allaffissuat Inatsisartullu ingerlaannaq matuneqarput oqoqarnera paasineqarmat illuanilli uagut maanna kommuunip allaffianni ukiorpassuarni tamanna atugarisariaqarlugu, Vittus Sanimuínaq oqarpoq.
Sullivinnik nakkutilliisoqarfik akissuteqarsimanngilaq kommuunip allaffiani sulisut oquk pissutigalugu niaqorluttarnerat nalunaarutigineqareeraluartoq.