Oquk ilimagisamit annikinneruvoq

Namminersorlutik Oqartussat illorsuata oqoqarnera paasineqarmat aarleqqutigineqarsimagaluarpoq illorsuaq iluarsaanneqartariaqassappat aningaasanik milliuunilikkaanik akeqassasoq. Maannali tamanna aarleqqutigisariaaruppoq.

Sullivinnit Nakkutilliisoqarfik Namminersorlutik Oqartussat illorsuata oqaqalersimanera pillugu apriilip sisamaanni sulisunik suleqqusiunnaarpoq. Maannalu illorsuup ilaa suliffigineqaqqissinnaasoq nalunaarutigineqarpoq.

- Illorsuup ilaa asanneqassaaq qalipanneqarlunilu sulisut iserterniassammata, Karsten Stounberg aningaasaqarnermut sulisoqarnermullu aqutsisoqarnermut pisortamit oqarpoq.

Inuplan A/Sip Namminersorlutik Oqartussat illorsuata oqoqarneranik misissuisuusup suli nalunaarusiani naammassinngilaa. Taamaammat nalunarallarpoq illorsuup nutarterneqarnissaa qanoq akeqassanersoq. Tamanna aatsaat paasineqassaaq, Inuplanip nalunaarusiaa maajip qulingani tunniunneqareerpat.

Namminersorlutik Oqartussat illorsua oqoqalersimasoq apriilip sisamaanni avammut nalunaaruteqarutigineqarpoq. Taamaasilluni Inatsisartut upernaajunerani ataatsimiinnertik Kommuneqarfik Sermersuup ataatsimiittarfiani nangippaat. Taamatullu aamma Namminersorlutik Oqartussat illorsuani sulisut 170-it missaaniitut, sullivimminni suleqqusaajunnaarallarlutik.
Maannalu tassa Sullivinnik Nakkutilliisoqarfimmit nalunaarutigineqarpoq, illorsuup ilaa asanneqareeruni qalipanneqareerunilu sullivigineqaqqissinnaanngussasoq, Karsten Stounberg taama radioavisimut oqaluttuarpoq.