Oquk amerlanertigut nammineq pisuussutigisarparput

Inissiani oquttuni eqqiaatinneqartartut ittuat taama oqarpoq.

- Eqqiaajartortinneqarnitsinni takusinnaasarparput, inigisap oqunnera inissiani ineqartut 90 procentiisa namminneq pisuussutigisaraat, ISS-ip ittua Lars Andersen oqarpoq.

- Oquk avatangiisitsinniippoq, sukkasoorujussuarmillu ineriartortarpoq. Igalaat matserfiinut piguni, inilu silaannarissarneqarneq ajorpat, erniinnaralannguaq ajornartorsiutinngortarpoq, Lars Andersen oqarpoq.

Oquit pinngorfii tassaapput oquit mikisuararsuit. Naasut assigalugit oquit naatsiiassatik atorlugit silaannakkut siaruartarput. Naatsiiassat isugutattumi oqunnguuttarput. Allatut oqaatigalugu, oquk isugutattumi naalluartarpoq.

- Oqoqartuaannarsimavoq, ukiut 20-t matuma siorna inissiani oquit soqutigineqarpallaarsimanngillat, maannali napparsimassutaalersinnaasut ilisimaneqaleramik maluginiarneqarnerulersimapput, Lars Andersen oqarpoq.

Inip nittartagaani atuarneqarsinnaavoq, Nuummi, Aasianni Qaqortumilu inissiat oqunnik saassunneqarnerpaasimasut, taamaattorli nalileruminaappoq qanoq annertutigisumik ajoqutaanersoq.

Nunatsinni nakorsaanermut taartaagallartup, Børge Sommerip, naqissuserpaa, inunnut anersaartorniarnermikkut nappaateqareersunut sapigaqartunullu, inip silaannalunnerata kinguneranik oquit ajoqutaanerunngitsut, inilli silaannalunnera ajoqutaanerpaasartoq.

- Inuit anersaartorniarnermikkut ajoqutillit, meeqqat inersimasullu sapigaqartut, inimi oquttumi najugaqarunik, taakkununnga oquk ajoqutaasinnaammat inunnut taamatut nappaateqanngitsunut naleqqiullutik.

Nunatsinni nakorsaaneq taartaagallartoq, Børge Sommer naggasiivoq.