Oqqumut aallartoqarnera maluginiarneqarpoq

Danmarkimi kalaallit amerlasuut inuiaqatigiinnut akuliunniarunik danskit oqaasiinik ilinniartinneqarnissaat maluginiarneqarnerulerpoq. Suliffissarsiornermi danskit oqaasiinik ilinniartitsinermi peqataasinnaaneq neqeroorutaavoq.

Kalaallit inuuniarnerminni atugarliortut danskit oqaasiinik iluatsittumik ilinniartinneqassappata ilinniartitaaneq sannavinnut atasunngortittariaqarpoq.

Esbjergimi kalaallit danskit oqaasiinik ornittakkami Oqqummumi ukiup aappaata affaata missaani ilinniartinneqartarput. Danskit oqaasiinik ilinniarneq sammisassanik allanik ilallugu ingerlanneqartarpoq; soorlu nipilersornermik, titartaanermik, sapakkerinermik qiperuinermillu.

Kofoedsskolep, Esbjerg kommunep Odensemilu Kalaallit Illuata Oqqumut suleqatigiillutik ingerlappaat.

- Esbjergimi atuartut Københavnimi atuartunut naleqqiullutik aalaakkaanerusumik atuariartortarput, inuuniarnerminni atugarliortut pillugit ilisimasaqarfimmi taakkulu pillugit paasissutissanik ingerlatitseqqiisarfimmi siunnersorti Gitte Tilia oqarpoq.

Kalaallit inuuniarnerminni atugarliortut tassani danskit oqaasiinik ilinniartinneqartarput ilinniartitsinerlu marloqiusanngorlugu avinneqarsimasoq Københavnimi Esbjergemilu ingerlanneqartarluni. Københavnimi atuariartortartut Esbjergimi atuariartortartunit aalaakkaannginnerunerat inuuniarnermi atugarliornerunermut attuumassuteqaratarsinnaasoq Gitte Tiliamit erseqqissarneqarpoq.

Oqqummumi pisortaasup Britta Gjelstrupip tamanna illuatungilerlugu oqarpoq Esbjergimi atuartitaaneq iluatsisimasoq ornittakkap atuartitsinerullu ataqatigiillutik ingerlanneqartarnerat pissutaalluni. Toqqissineq inuttullu akuerineqarneq taamaalilluni malunartarpoq.

- Atuartut illu nalunngilluaramikku toqqissisimaffigalugu atuartinneqarnerat iluatsilluarsimasutut oqaatigineqarsinnaavoq, Britta Gjelstrup oqarpoq.

Århusimi Kofoedsskole taamatut aamma misilittagaqarpoq. Tassani kalaallit atuartut kalaaliinnaallutik danskit oqaasiinik ilinniartinneqarsinnaanertik toqqarsinnaavaat.

- Inuttut ilorrisimaaneq ilikkagaqarluarnarpoq, danskit oqaasiinik ilinniartitsisoq Lene H. Madsen oqarpoq.

Esbjergimi oqaatsinik ilinniartitsineq ukiup naanerani taamaatissaaq, angusalli pitsaasut pissutaallutik aappagu ilinniartitsinerup ingerlanneqarsinnaanera neriuutigineqarpoq.