Oqimaappallaat iviangimikkut kræfteqalernissaat qaninnerusarpoq
Arnat 18-ileereernerup kingorna aaqassaarnerullu tungaanut, kingornalu oqimaalliartuinnarsimasut, aaqassaarnerup kingorna iviangimikkut kræfteqalernissaminnut qaninnerusarput.
Arnat oqimaalliartuinnartillugit iviangimikkut kræfteqalernissaat qaninnerulertarpoq. Taama mississuinerit nutaat atuagassiami JAMA-mi saqqummeqqammersumi atuarneqarsinnaavoq.
Misissuinermi arnat 87.143-t peqataapput, tassanilu takuneqarsinnaavoq arnat 18-ileereernerup kingorna 25 kilo-t sinnerlugilluunniit oqimaallisimasut, arnanut oqimaallisimanngitsunut sanilliullugit 45 procentimik annerusumik kræfteqalernissaminnut qaninnerusartut.
Aamma aaqassaarnerup kingorna oqimaalliartortut iviangimikkut kræfteqalernissaminnut qaninnerusarput. Arnat aaqassaarnerup kingorna 10 kilo-mik sinnerluguluunniit oqimaallisut, arnanut oqimaalliartunngitsunut sanilliullugit 18 procentimik annerusumik kræfteqalernissaminnut qaninnerusarput.
- Oqimaallineq qaqugukkulluunniit pigaluarpat, aaqartarunnaarnerup kingorna timimiittup orsup arnat hormoniannik østrogenimik pilersitsitsinera annertusisarpaa, taamaalillunilu iviangikkut kræfteqalernissaq qaninnerulersarpoq. Taamaammat aaqartarunnaarnerup siorna kingornalu oqimaallinaveersaarnissaq innersuutigineqarsinnaavoq, Kræfti akiorniarlugu suleqatigiiffimmi, kræfti oqimaappallaarnerlu pillugit ilisimatooq Jytte Halkjær oqarpoq.
Paasisat tunngavigalugit arnat oqiligunik iviangikkut kræfteqalersinnaanissartik annikillisissavaat.
- Pitsaanerpaavorli inuuneq naallugu peqqinnartumik allanngoranngitsumillu oqimaassuseqaraanni. Oqimaassuseq allanngorarpallaanngippat timimut peqqinnarnerpaavoq, oqimaappallaalereersimagaannimi oqiliniarneq ajornarnerusarpoq, Jytte Halkjær oqarpoq.
