Inatsisartut ataatsimiittarfiat allanerusumik inoqarpallaanngilaq.Assi: Pele Broberg, Partii Naleraq.

Oqartussat pinngitsaaliissummik katsorsaasinnaalersut

Inatsisartut sukaterinerit sakkortuut qassiiusut akueraat, taakkua oqartussat coronavirusimut tunngatillugu sulinerannut sakkussaqarnerulersitsissapput.

Inatsisartut akunnerit arfinillit isumaqatigiinniareerlutik inatsit nukingisaarutaasoq coronavirusip tuniluunnissaanut pinaveersaartitsisussaq amerlanerussuteqarlutik akueraat.

Siumut, Inuit Ataqatigiit, Nunatta Qitornaasalu inatsit nukingisaarutaasoq isumaqatigiissutigaat.

- Maannakkut pisut siumut ilisimareersinnaasimanngilagut. Taamaammat sakkussanik amerlanerusunik pisariaqartitsivugut, Kim Kielsen oqaaseqartarfimmit oqarpoq.

Sakkussaqarnerulersut

Oqartussallu tunillaassortunik nappaanersuaqarneranut inatsimmut nutaanik allannguuteqartoqarneratigut sakkussaqarnerulerput.

Assersuutigalugu nunatta nakorsaaneqarfiata inuit napparsimasut imaluunniit napparsimasorineqartut misissorneqarnissaannut, napparsimmavimmut innartinnissaannut katsorsarnissaannullu Naalakkersuisut akuersissuteqarfigisinnaalerpai.

Inatsip aamma katerinnerit inerteqqutaasinnaalersippai, tassa imaappoq katersuunnerit tunillaassortoqarfiusinnaasut politiinit unitsinneqarsinnaalerput. Politiit tamatumunnga atatillugu ininut eqqartuussiviup akuersissuteqarfiginngisaannut inersinnaalerput.

- Taanna peerneqassappat inatsisissatut siunnersuutip tunngavia tamarmi peerneqassaaq. Inuit taamaalillutik pisiniarfinni katersuuttarfinnilu katersuuttaannarsinnaapput. Tamanna pinaveersaartinneqassaaq oqaatigisinnaavaralu tamanna atornerlunneqarnavianngitsoq, Kim Kielsen partiit qassiiusut suliniummut ernumassuteqarlutik oqariartuuteqareersut oqarpoq.

Inatsit taanna politiit eqqartuussiviup akuersissuteqannginneratigut angerlarsimaffinnut isersinnaalernissaattut nipeqarsimagaluarpoq.

AAMMA ATUARUK Naalakkersuisut erseqqissaassuteqalersut: Politiit angerlarsimaffinnut isersinnaanngussanngillat

Kisianni innuttaasut, partiit, inuillu pisinnaatitaaffii pillugit suliniaqatigiiffiisa isornartorsiuereerneratigut tamanna angerlarsimaffinnut atuutinngitsoq Naalakkersuisut ilannguppaat.

Allannguutit annertuut Inatsisartuni ullumi akuerineqartut amerlanerussuteqarluartumik isumaqatigiissutigineqarput, allannguutissallu pisariaqarluinnartut partiinit aamma isumaqatigiissutigineqarluarput.

Inatsisartuni ilaasortat 13-it akuersipput sisamallu taasinatik.

Isummersuutit