Oqartussat: Neriniartarfiit eqqiluisaanngitsut nalunaarutigikkit

Uumasut nakorsaat Raiku Sarvijoki Namminersorlutik Oqartussani atorfeqartoq ima nassuiaavoq:

- Allanik periarfissaqanngilagut, neriniartarfiit nalunaarfigeqqaarnagit, nalusaanik tassanngaanaq sumiiffinnut ornigunnissatsinnut. Kalaallit Nunaat tamakkerlugu, uumasut nakorsaat tallimaanaavugut, taamaammat sulinerput killeqarsinnaasarpoq.

Taassuma oqaatigaa  neriniartarfiit nunatsinniittut tamarmik eqquluisaarnissamik inatsimmik malinninnersut qulakkeersinnaannagu.

Neriniartarfinni atuisartut neriffigisartik saligaatsuunnersoq qulakkeersinnaanngilaat. Neriniartarfinniluunniit eqquluisaarneq pingaartinneqarnersoq qulakkeersinnaanngilaat. Taamaattumik atuisartut toqunartulinnik allaat nerisinnaapput.

Qanittukkut maniitsumi neriniartarfiit Café Puisi aamma Café Pølsemik, eqqiluisaarnissamut malittarisassanik malinnissimannginnertik illullu iluarsagassaanerat pissutigalugit, inunnut nerisassanik tunisisinnaanngitsutut nalilerneqarlutik  sukkanerpaamik matuneqarput.

Namminersorlutik Oqartussani uumasut nakorsaanit oqaatigineqarpoq, innuttaasut eqqiluisaannginnermik malugisaqaraangamik erngerlutik nalunaaruteqartassasut.

- Innuttaasut maalaaruteqaraanga assut tatiginnittarpugut ataqqinnillutalu. Taamaammat atuisartoq kinaluunniit, saaffiginninneratigut annertuumik ikiorneqartarpugut.