Oqartussani atorfilittat taarseraannerujussuat apeqquserpaa
Namminersorlutik Oqartussani qitiusumik atorfilittat taama taarseraatsiginerat, Robert Klemmensenip tupigusuutigaa:
- Kalaallit Nunaanni oqartussani qitiusumik atorfilittut inissisimasut 60 procentiisa missaat soraarsitaasimanngikkunik, soraarnermi immikkut isumaqatigiissusiorfigineqarsimanerat eqqarsarnarpoq. Taamaatummi taarserartiginerat kingunipiloqarsinnaavoq, Robert Klemmensen, naalagaaffimmi aqutsinermik ilisimasalik, Syddansk Universitetimilu lektori oqarpoq.
Taanna Nunatsinni aqutsinermut tunngasunik immikkut misissuisimanngilaq, Danmarkimili politikkikkut pissutsit assigiinngitsut naalakkersuisoqarfinnut kommunaldirektørinullu sunniuteqataat ilaatigut qulaajaaffigisimallugit.
Naalakkersuisoqarfinni atorfillit qulliunerusumik inissisimasut politikkikkut anguniakkanut naammattumik peqataarussimannginnerannut, Naalakkersuisoqarfinni inuttanik taarsersuipiloorneq ersiutaalluinnartoq, Robert Klemmensen naliliivoq.
Naalakkersuisoqarfimmi pisortaq soraarsitaasimagaangat, namminerluunniit tunuarsimappat, taava sulisut akornanni ileqqulersuutit allanngortartut, taassuma oqaatigaa:
- Pisortaqarfinni naalakkersuisoqarfinnilu atorfillit qaffasinnerusumut nuukkusuppata qanoq iliuuseqartarnissaannut tikkuussisarpoq, tassalu oqimaaqatigeeqqissaarneq allanngorsinnaasarpoq, sulisut politikkikkut illersorneqarsinnaasutut isigisaminnik annerusumik siunnersuisalerlutik, suliap pitsaassusissaanut illersorneqarsinnaasut tunulliullugit, Robert Klemmensen oqarpoq.
Naalakkersuisoqarfiup pisortaa tunuaraangat, naalakkersuisoqarfimmi atorfillit ilaasa aamma tunuarniuteqartarnerat takornartaanngitsoq, Robert Klemmensenip aamma oqaatigaa:
- Aamma saniatigut ajornartorsiutaasinnaavoq, atorfillit qaffasissumik inissisimasut ilaat taama amerlatigisut suliunnaarpata, misilittagarpaalussuit annaaneqassammata. Tassalu allatut oqatigalugu, qullersaasimasup suliarisimasaannik tigusariaannarnik aaqqissuussaanermi appasinnerulaartumi inissisimasoqanngippat, taava sulianik ingerlatsineq nalornisumik pissuseqarluni isumagineqaleriartorsinnaavoq, Robert Klemmensen oqarpoq.
Naammassinnilertorsinnaanermut sukkassusermullu iluaqutaaginnassannginnersoq, immikkut ilisimasalik aperaarput.
- Aap, taamaaliorneq iluaqutitaqarsinnaavoq. Kisianni aamma nunami inatsisit malinneqarnersut, atorfilittat qulakkeertussaavaat. Tassalu atorfillit piukkoorpallaarunik killissallu qaangerumavallaarpatigit, pitsaanngilluinnartumik kinguneqarsinnaavoq, Robert Klemmensen oqarpoq.
AG-p tusarfii naapertorlugit Namminersorlutik Oqartussat inatsisinut tunngasunik allaffianni pisortap Andreas Salmonyp sorarsitaanera, naalakkersuisoqarfimmi malittarisassat unioqqutinneqarnissaat peqqutaasimavoq.
