Oqartussaaffiup tuttut qumaqarnerisa mianersuunneqarnissaat kaammattuutigaa

Naalakkersuisut Kalaallit Nunaanni Uumasunut Nakorsaqarfik Inuussutissalerinermullu Oqartussaaffik sinnerlugit aavarfiup nalaanut atatillugu tuttut qumaat pillugit tusagassiuutinut nalunaaruteqarput.

Qumannik nassaartoqarnera imaluunniit mianersorluinnarnissamik nalunaaruteqarnissaq pineqanngilaq. Naalakkersuisulli innuttaasut sunik eqqumaffiginnittariaqarnersut paasissutissiipput.

Innuttaasut mianersornissamik tunngaveqartumik nujuartat neqaannik tamanik 75 gradimik kissaaqqaartarnissaat, Uumasunut Nakorsaqarfik Inuussutissalerinermullu Oqartussaaffiup kaammattuutigaa.  

- Taamatut uunartumiititsineq uumasuaqqanut miluuffigisaminut inuussutilinnut toqoraataassaaq. Neqi naammattumik qalaassaq siatarluunniit qasertumik kajorpasissumilluunniit qalipaateqalersarpoq, Uumasunut Nakorsaqarfik Inuussutissalerinermullu Oqartussaaffik allappoq.

Neqi qumaqartoq ima suliarineqassaaq

Uumasunut Nakorsaqarfik Inuussutissalerinermullu Oqartussaaffiup qumaat assigiinngitsut tallimat tuttuniissinnaasut nassuiaatigai:

Trikinose, sarcocyster, qumaarsussuit, tuttup kumai, tuttup iggiaata kumaa.

Neqimik qerititsineq, pujoorineq nikkulinerluunniit trikininut, qumaarsussuarnut sarcocysterinulluunniit toqoraataanngillat. 

- Uumasut nujuartat neqaat qalanneqarluarsimanngitsut nunaannarmut qimanneqartassanngillat qimminulluunniit nerukkaatigineqartassanatik. Taakku tamarmik uumasuarsunnik ingerlatitseqqeqataasinnaapput tassami kinguaassiornerminni uumasut qaasuttut silutuumasullu pisariaqartikkamikkit, Uumasunut Nakorsaqarfik Inuussutissalerinermullu Oqartussaaffik allappoq.

Uumasunut Nakorsaqarfik Inuussutissalerinermullu Oqartussaaffiup qimmillit qimmii napparsimalersinnaasut maluginiassavai.

- Neqinik uumasuarsunnik tunillanneqarsimasunik qimatsisariaqalissaguit kaammattuutigineqassaaq ikuallassagitit, minnerpaamik 1 meteritut ititigisumut nunami matuussagitit imaluunniit imaanut kivisissagitit.