Oqartussaaffinnik nussuineq kinguaattoorpoq

Suliassaqarfiit assigiinngitsut Namminersorluni Oqartussanit kommuninut nussorneqarnissaat pilersaarutit malillugit pisimanngitsoq, Nunamut Namminermut Naalakkersuisoq, Anthon Frederiksen oqarpoq.

- Nussuinerit siulliit januaarip aallaqqaataani 2009-mi pereertussaangaluarput, kisianni piareersimannginneq aamma kommunit kissaateqarnerat naapertorlugu kinguartinneqarnikuuvoq. Aatsaat massakkut ukiup aappaa affaata qaangiunnerani ilaannai piviusunngortinniarneqalerput. Pilersaarusiornermi aningaasaqarnermut tunngasut erseqqarinnerusumik naammattumik pilersaarusiorneqarsimannginnerit ilaatigut tamatumunnga pissutaavoq, Anthon Frederiksen oqarpoq.

Kinguaattoorneq tupigisassaanngitsoq Anthon Frederiksen oqarpoq.

- Aaqqissuussineq nutaajoqaaq aatsaallu aamma siullerpaamik misilinneqartussaalluni, taamaammat taamatut kinguaattoorneq tupigisassaanngilaq. Kisianni pilersaarusiorluarsimanissaq pisariaqarluinnarpoq, Anthon Frederiksen oqarpoq.

Oqartussaaffinnik nussuinissaq 2009-miit 2013-ip tungaanut pilersaarutaasimangaluartoq, 2016-ip tungaanut kinguartinneqarnissaa ilimagineqarpoq.

- Suliassaqarfiit nutaajupput aatsaallu siullerpaamik misiliineruvoq, Anthon Frederiksen oqarpoq.

- Aamma isumalioqatigiissitat 2005-imiit sulisimasut inassuteqaataat assigiinngitsorparujussuupput, ilaatigut naalakkersuisunit isumaqatigineqarput, ilaalli aamma isumaqatigineqanngillat. Tassani nalilersuinerit assigiinngitsut apeqqutaaqataalluinnarput, Anthon Frederiksen oqarpoq.

Anthon Frederiksenip oqaatigaa Namminersorlutik Oqartussaniit kommuninut suliassaqarfinnik nuussineq aningaasanik annertuumik sipaaruteqarfiujumaartoq.

- Kommunit nammineersinnaanerat annertusippat qularutiginngilara sipaarnissaq aamma anguneqarsinnaasoq, Anthon Frederiksen oqarpoq.