Oqartussaaffik avatangiisinut ministerinut tunniuteqquaat
Nunarsuarmi silap kiatsikkiartornerata issittumut kinguneri pillugit suliniutit Issittumi Siunnersuisooqatigiinni nunanut allanut ministerit akisussaaffigiligassaat, ilisimatuunit ernumanartoqartinneqarpoq, isumaqaramik akisussaaffik avatangiisinut ministerinit isumagineqartariaqaraluartoq.
- Nunani issittuni qanoq iliuuseqartoqarnissaa utaqqiinnarsinnaanngilarput, Nunani Issittuni Siunnersuisooqatigiit avatangiisit pillugit ataatsimeersuarneranni Københavnimi ippassaq pisumi, Sverigep avatangiisit pillugit ministeria, Andreas Carlgren oqalugiaammini ilaatigut taama oqarpoq.
Nunani issittuni najugallit peqqinnissaannut ulorianartorsiortitsisinnaasut soorlu, kviksølvip ulorianaataasa immami nunamilu pinngortitamut aseruisinnaaneri aamma immat qaffakkiartornerisa paasissutigineqarnerani "kalerriunneqarneranilu" tusarliussat Carlgrenip oqariartuutigai.
Ulorianartorsiortitsineq taamaatsillugu politikkikkut maanngagaaq qanoq iliuuseqartariaqartoq, Nuummi ataatsimiinnissaq sioqqullugu ilisimatuut 400-it oqariartuutaat pingaarneq taama qulequtaqarpoq.
- Avatangiisit aamma silap pissusaata allanngortiartorneri taama sukkatigisumik sunniukkiartorneri paasereerlutigit, nunat ilaasortaasut nunanut allanut ministeriisa ilisimatuut paasissutissiinerisa inerneri akisussaaffigilerpatigit tamanna ajornakusoortussanngussaaq, avatangiisit pillugit ataatsimiisitaliami, AMAP-imi ilaasortaasimasoq canadamiu David Stone oqarpoq nangillunilu:
- Nunani issittuni Siunnersuisooqatigiit nunat ilaasortaasa nunanut allanut ministeriisa ataatsimiinneranni, issittumut pingaarutillit aammalu aningaasaqarniarnermut pingaarutit allamut sangutinneqariaannaapput, Stone oqarpoq, siunnersuutigalugulu pissutsit taamaattut avatangiisit pillugit ministerinut tamakku akisussaatinneqartariaqaraluartut.
