Oqartussaaffiit amerlanerusunut siammartariaqarsoraat
Demokratii pillugu nalunaarusiaq Nunat Avannarliit Siunnersuisoqatigiiffiannit ataatsimiititaliamut suliarineqartoq ullumi saqqummiunneqarpoq. Nunatsinniit ataatsimiititaliamut ilaasortaq Daniel Thorleifsen isumaqarpoq teknologimi nutaami ingerlassineqartillugu ilinniagartussuseq, aningaasarsiaqartussuseq apeqqutaallutik inuit ilaat periarfissakinnerusut allaninngarnit.
- Siunnersuutigaarput kommuninut qinigaasartut atugassarititaat suli pitsanngorsarneqassasut, inuit amerlanerpaat oqartusaaqataallutik kommuniminnilu suleqataalernissaat aamma aqqutissiuunneqassasoq, Daniel Thorleifsen oqarpoq.
Daniel Thorleifsen oqarpoq tamanna anguneqarsinnaasoq kommunalbestyrelsimut ilaasortat amerlasinneqarnerisigut, taamaalillutik inuit akornanni oqartussaaqataaneq anguneqarsinnaammat.
Nalunaarusiaq marlunnik atuaganngorluni saqqummerpoq. Imarivaalu nunani avannarlerni inuit tamat oqartussaaqataaneranni atugassaritaasut periarfissarititaasullu qanoq innersut, oqartussaaqataaneq killilersorneqarnersoq imaluunniit tamatigoortumik atuutinneqarnersoq.
Nunani Avannarlerni Siunnersuisoqatigiit Island-imit siulittaasuuffigineqarnermi nalaani Inuit Tamat Oqartussaaqataanerat sammineqarnissaa aalajangerpaat. Nunat Avannarliit Siunnersuisoqatigiiffiat, Nordisk Råd Danmarkimit maanna siulittaasuuffigineqarpoq.
