Oqarasuaatit angallattakkat kræfteqalissutaasinnaapput

Immikkut ilisimasallit kattuffissuarmit WHO-p kræfteqalissutaasartut ilisimatusarfigineqarfianniit misissuisitat, oqarasuaammik angallattakkamik atuineq qaratsakkut kræfteqalissutaasinnaasutut nalilerpaat. Video-mi ilanngutassiaq takuuk.
juunip 07-at 2011 09:05

LARC-imik taaneqartumit ilisimatuut, radiop maligaasaanik elektromagnetiskiusunik misissuereernermik kingorna, oqarasuaatit angallattakkat kræfteqalersitsisinnaasutut nalilerpaat.

Taamaalillutik ilisimatuut oqarasuaat angallattagaq immikkut ulorianaatilimmik gliomimik taaguutilimmik qaratsakkut kræfteqalertitsisinnaasoq nalilerpaat.

LARC-imeersut naliliinertik tunngavigalugu radiop maligaasaasa mobiltelefonimeersut sunniutai annikinnerpaanissaat siunertaralugu atuisunut malikkuminartunik  siunnersuuteqarpoq.

Siunnersuutit pingaarnersaraat oqarasuaammik angallattakkamik oqaluussinermi attavilimmik attaveqanngitsumilluunniit siutinut ikkuttartumik tusartaaserluni oqaluussisarnissaq, oqaluussinani nalunaarasuartarnissaq (sms) sivisuumillu oqaluussinani pisarialiinnaat oqaloqatigiissutigisarnissaat.

Kræfteqalersinnaanermulli uppernarsaatissat killeqarput. Taamaammat oqarasuaammik angallattakkamik atuinikkut qaratsakkut kræfteqalersinnaanerup ilimanaateqarsinnaasorineqarnera apeqquserneqartoq immikkut ilisimasallit oqaatigaat.

Taamaattorli Nunatsinni Nakorsaaneqarfiup siunnersuutit oqarasuaammik angallattakkamik atuisunit malinneqarnissaat siunnersuutigaat. Taamatullu aamma angajoqqaat meeqqat oqarasuaammik angallattakkamik atuinerat sapinngisamik killilersimaarniarsarissagaat meeqqallu minnerit oqarasuaammik angallattakkamik pisaartinneqannginnissaat siunnersuutigaat. Tamatumunnga tunngavilersuutigaat meeqqat niaquisa saarngat inersimasunut sanilliullugu saannerummat qarasarlu inuusuttuaranngorneq ilanngullugu ineriartortarmat. Meeqqalli oqarasuaatip radiop maligaasaanik elektromagnetiskiusunik sunnertianerunersut ilisimaneqanngilaq.

Nunatsinni Nakorsaaneqarfiup paasisat nutaat malinnaavigiuassavai.