Oqarasuaatit angallattakkat attavilukkunnaarput

Oqarasuaatinut angallattakkanut attaveqaatit sapaammi unnukkut attaveeruttaqattaartut, maannakkut aaqqinneqartut TELE POST nalunaarpoq.

Allattoq Jaaku Lyberth

marsip 08-at 2016 17:07

Teknikerit oqarasuaatinillu angallattakkanik attaveqaammik pilersuisut TELE-POST-ip oqarasuaatinut angallattakkanut attaveqaataata ajoqutaa sapaatiummat unnukkulli aaqqippaat, TELE POST tusagassiuutinut nalunaaruteqarluni taama allappoq, oqarasuaatinullu angallattakkanut attaveqaatit attaveeruttaqattaarsimanerat ajuusaarutigalugu.

- Sullitatsinnut tamatuma ajoqusersuutaanera assorsuaq ajuusaarutigaa. Maannakkorpiaq pinera assut ajuusaarnarpoq, oqaatigisinnaavarali oqarasuaatinut angallattakanut attavik AWG2016-ip nalaani atuisut amerlanerunerannik pissuteqartumik piginnaasap ajornartorsiutigineranik pissuteqannginnera, Jonas Hasselris TELE-POST-imi Teknikkimut aamma IT-mut suliaqarfimmi qullersaq oqarpoq.

Aamma atuaruk Oqarasuaatit angallattakkat attavilupput

Attaveerunnernut pissutaavoq oqarasuaatit angallattakkat attaviinut qitiusoqarfimmi atortut ilaata pingaarutillip ajoquteqarnera.

TELE POST oqarasuaatinik angallattakkanik atuisunut kaammattuuteqarpoq: Sullitat suli SMS-inik nassiussisinnaanatillu tigusisinnaanngitsut imaluunniit sianerfigineqarsinnaanngitsut, oqarasuaatertik angallattagaq qameriarlugu ikeqqittariaqarpaat, taamaalilluni nutartersinnaassammat. Ajornartorsiummut tamanna aaqqiissutaassaaq, nalunaarummi allapput.