Oqarasuaat angallattagaanngitsoq akikillissaaq
Tele Greenlandimi siulersuisut akit assigiit aalajangersimasut nunarput tamakkerlugu atuutilernissaat piginnittunut, tassa Namminersornerullutik Oqartussanut siunnersuutigigaat, siulersuisut siulittaasuata Kaj Egedep oqaatigaa.
Oqarasuaatit angallattakkat annerusumik atugaaleriartornerat, Tele Greenlandip qularnaarlugu paasereerpaa. Kisianni oqarasuaatit angallattagaanngitsut nalunngilluakkavut pineqartillugit atuisut ikiliartorput. Taavami qanoq iliortoqarsinnaava? Aap, oqarasuaatinik taamaattunik atuisut akikillisaavigineqarsinnaapput.
- Siunnersuuterput naalakkersuisunit akuerineqassappat, illoqarfiit akornanni sianerneq 55 procentit missaannik akikinnerulissaaq, Tele Greenlandip siulersuisuini siulittaasoq Kaj Egede oqarpoq.
Qanittukkut ukiumoortumik ataatsimeersuarnermi naatsorsuutigineqareersutut akileraarutinut akiliinnginnermi siorna 118 miliuunit koruuninik sinneqartoortoqarpoq. Isertitat tamakkerlugit qimerlooraanni Telep isertitai 96 miliuunit koruuniupput. Allakkeriviullu isertitai 17 miliuunit koruuniullutik.
Kisianni maannangaaq oqaatigereersinnaavarput, 2008-mi aamma 2009-mi taama amerlatigisunik sinneqartoornissarput naatsorsuutigineqarsinnaanngimmat. Internetimut atuinermut pitsanngorsaataasussamik attaveqaatit aqqutaannik immap naqqatigoortumik pilersitsilerpugut. Tamanna 750 miliuunit koruuninik akeqassaaq, tamatuma saniatigut radiukkut attaveqaatit nutarterneqarnerat aningaasartuutaassaaq, atuisutta taamaalillutik immap naqqatigut attaveqaatit atorluarsinnaaniassammatigik, siulersuisut siulittaasuat nassuiaavoq.
Ukiumoortumik ataatsimeersuarnermi Namminersornerullutik Oqartussat piumasaqarnerisigut siulersuisuni ilaasortat ataatsimik ilaneqarput, tassa KNR-ip pisortaa Lars Lennert Sandgreen ilaasortanngortinneqarmat.
- Atuisut siulersuisuni amerlanerusunik aallartitaqarnissaat piginnittunit kissaatigineqarmat taamaaliorpugut, Kaj Egede Oqarpoq.
Annertuumik atuisut ilaata siulersuisuni ilaasortaatitaqalernera ajornartorsiutaanngilaq. Apeqqutinut ataasiakkaanut attuumassuteqarpallaartoqarsinnaavoq, tamakkuli pillugit malittarisassaqarpugut, Kaj Egede naggasiivoq.
