Oqaluuserisassat ilaat - aningaasaqarneq

Inuussutissarsiornikkut periarfissat nutaat ilinniakkanut nuulertorsinnaassusermut inissaqarnermullu piumasaqaatit sakkortunerusut, tassaapput Aningaasaqarnikkut Ingerlatsineq pillugu Nalunaarusiami Inatsisartut upernaakkut ataatsimiinneranni, marsimi pisussami, sammineqartussat.

Aningaasaqarnermut Naalakkersuisup, Josef Motzfeldtip, Naamminersornerullutik Oqartussat nittartagaanni tamanut saqqummiussaani tamanna erserpoq.

Nunat tamat akornanni niuerniarnikkut unammilleqatigiinnerup alliartornera, aalisakkat ikiliartornerat, tunisassiallu maskiinanut suliassanngorlugit aaqqissuussinerit kingunerannik inuussutissarsiutitoqqavut piniarneq aalisarnerlu ilungersunarsiartorput.

Sulisinnaasut inuussutissarsiutitoqqat qimallugit inuussutissarsiutinut ineriartorfiusunut nuuttariaqassapput, soorlu takornariaqarnikkut, aatsitassarsiornikkut saviminernillu akuiaavinnut imaluunniit peqqinnissaqarfimmi-, inunnik isumaginnittoqarfimmi ilinniagaqarfinnilu atorfinnut.

Paasisaqarnerorusukkussi nanoq naggat gl-imi alakkarterisinnaavusi.