Inatsisartut ataatsimiinneranni oqaluuserisassaq nr. 44, Inatsisartut Peqqussutaat nr.10, 2001-imi novemberip ulluisa aqqaneq-aappaanninngaaneersoq, Aalisartut, Piniartut Nunalerinermilu Inuussutissarsiuteqartut Siuarsarneqarnissaasa allannguutissanik imalik, oqaluuserisassanit peerneqarpoq.
Allannguutissatut siunnersuut aqagu marlunngornermi, novemberip ulluisa 14-ianni, Inatsisartut ataatsimiinneranni pingajussaaneerlugu oqaluuserineqartussaagaluarpoq.
Aalisarnermut Piniarnermut Nunalerinermullu Naalakkersuisoq, Finn Karlsen, ualeq ulapittorujussuaq oqarpoq, allannguutissatut siunnersuut Inatsisartut upernaaru ataatsimiinnissaannut kinguartinneqartoq.
- Allannguutissatut siunnersuutit marluk upernaaru saqqummiunneqassapput. Aalisarnermut Piniarnermullu Peqqussutissaq, taavalu immikkoortoq Nunalerinermut Peqqussutissaq, Finn Karlsen oqarpoq.
Peqqussut maannamut atuuttoq allannguuteqarnani upernaap tungaanut pisarnermisut atorneqarallassaaq.
-Taamaallaat nutaartaraa, kinguaariit nikinneranni savaateqarfimmik tigusisup aallarniutissanik akiliisarnerata peerneqarnera. Erneq, panik ernutaasorluunniit immikkut akiliuteqarnatik savaateqarfimmik maanna tigusinnaalerput, Finn Karlsen nassuiaavoq.