Oqaluusereqqusap ilaannginnera Avalammi pakatsissutigineqarpoq

Inatsisartut upernaakkut ataatsimiinnissaannut apeqqut aalajangersimasoq ilanngunneqarsimanngimmat, Kalaallit Danmarkimi ilinniagaqartut Kattuffiat, Avalak, pakatsisimaarlunilu ugguarpoq.

Apeqqutip pineqartup imarisaa tunngavilersuutigineqartullu erseqqilluinnartumik assigiinngissuteqarmata, Siulittaasoqarfiup apeqquteqaat itigartippaa.

Siumut siulittaasua, Inatsisartunut ilaasortaq Aleqa Hammond apeqquteqartuuvoq. Taaassumalu siunnersuunni allanngoriarlugu Siulittaasoqarfik qinnuigaa aalajangernini allanngorteqqullugu.

- Soorunami taamaaliussaagut, Inatsisartut siulittaasuat, Josef Motzfeldt, oqarpoq. Apeqqutip itigartinnissaa siulittaasoqarfimmi matoqqasumik ataatsimiinnermi aalajangerneqarsimavoq, sunalu tunngaviunersoq nassuiarnissaa Josef Motzfeldtip kissaatiginngilaa.

Kisianni tassa apeqqut ilanngunneqassanersoq siulittaasoqarfiup suliareqqittussanngorpaa.

Avalaap kissaatigaa, kalaallit Danmarkimi nunanilu allani ilinniartut danskisut ilinniartutut isigineqalernissaat oqaluuserineqassassoq, tamatumani ilaatigut atuagarsinermi angalanermilu akikillisaavigineqarnissaq ajornanginnerulissammat.