Oqaluttuatoqqat tunisaalluartut

Atuagaq ataaseq immikkuullarissuusoq Milik Publishingimi aaqqissuisup, Julie Rehhoff Kondrupip, KNR-imut oqaatigaa.

- Ukioq manna atuagaq uisaallannartoq tunisaanerpaarlu tassaavoq "Ataqqinartuaraq", "Den lille prins", augustimi meeqqat atualinngitsiarneranni saqqummertoq. Atuagaq Kalaallit Nunaat tamakkerlugu meeqqat atuarfianni klassinut tamanut tunniunneqarpoq. Kommuneqarfik Sermersuumilu atualerlaanut tunniunneqarluni, Julie Rehhoff Kondrup oqarpoq.

Atuagaq pisiniarfinni pisiarineqarluartoq aamma oqaatigaa.

Atuagaq 1943-meersoq 

Franskiusup Antoine de Saint-Exupéry-p "Ataqqinartuaraq" atuakkiaraa, 1943-mi saqqummersinneqaqqaarluni. Oqaatsinut 300-ut sinnilinnut atuagaq nutserneqarpoq nunarsuarlu tamakkerlugu atuakkanut tunisaanerpaanut ilaalluni.

Schweizimeersoq pisoorsuaq Jean-Marc Probst aningaasaliisoralugu atuagaq kalaallisuunngortinneqarpoq.

AAMMA ATUARUK Schweizemiup pisoorsuup meeqqanut atuakkiap kalaallisuunngortinneqarnera aningaasaliiffigigaa

Saqqummerneraniit ukiut 74-it qaangiutereeraluartut atuagaq 2017-imi aamma nuannarineqaqaaq.

- Atuakkap kalaallisuunngortinnera naqiteqqinneqarpoq, maannalu 1200-ut tunereerpagut, Milik Publishingimi aaqqissuisoq oqarpoq.

Unikkaat kujataaneersut

Atuagatoqqanili nuannarineqarluarsimasuni taanna kisiartaanngilaq. "Akamalik" sapaatip akunnerani kingullermi saqqummersinneqarpoq. Atuakkap imarisai Kujataani unikkaanik imaqartut Faré Høeghimit 1930-kkunni katersorneqarsimapput.

Aatami katersai Faré Høeghip ernutaata Malik Høeghip allattaasitaaq atorlugu ukioq manna saqqummersippai. Atuagarlu nuannarineqarluartoq maannamut takuneqarsinnaavoq.

- Tunisaalluaqaaq, tassami atuagaq inunnit 100-ut sinnerlugit pisiarineqarsimavoq, aaqqissuisoq Julie Rehhoff Kondrup, juullinngitsiarnerani apersorneqarluni oqarpoq.

AAMMA ATUARUK Malik Høeghip atuakkiaani oqaluttuatoqqat uummartinneqartut