Oqaluttuaatitoqqagut titartakkatut filmiliarineqassapput

Titartakkanik filmiliortartoq danskeq nunatsinni oqaluttuatoqqat filmiliariniarlugit eqqarsaatersorpoq. ”Terkel I Knibe”, ”Asterix Og Vikingerne Kommer” aamma ”Hjælp Jeg Er En Fisk” titartaganngorlugit taassuma filmiliarereerpai.

Filmilianik titartakkanik Berlinimi takutitsisoqarnerani titartakkanik filmiliassap Mikisup takuteqqaarneqarnissaanik sulissutiginnittuuvoq isumassarsisoq Søren Olsen.

- Mikisoq kalaaliaaraavoq amernik sapigalik. Issittumi najungaqartuulluni oqortunik atisaqarniaraanni amertalinnik atisaqartariaqarpoq. Mikisorli amernik sapigaqarnini pissutigalugu Kaassassuttut qinngasaartittarpoq. Amernik sapigaqarnini pillugu ammit eqqaannut pigaangami tangajortuarlersarpoq, taamaammallu piniaqataaneq ajorluni. Angerlarsimaannartuunini pillugu assassorluni nutaaliortartuuvoq. Taannalu tassaavoq uagut titartaganngorlugu filmiliarerusutarput, Søren Olsen oqarpoq.

Filimiliorneq nakeqarmat Søren Olsen ulluni makkunani aningaasaliisussarsiorpoq. Aperaarpullu sooq kalaallit oqaluttuatoqaat filmiliarinerlugit eqqarsarnersoq imalu akivoq:

- Kalaallit oqaluttuatoqaat ukiorpassuarni toqqortaatigineqarsimapput erlinnarluinnartuullutik. Titartakkanillu filmiliornermi oqaluttuaatitoqqat taamaattut filmiliarineqanngisaannarsimapput. Uangalu isumaqarpunga titartakkanik filmiliornermi nutaaliortaqariaqalerluta, Søren Olsen oqarpoq.

Inuit 100-t missaat filmiliornermi peqataassapput, kalaalerlu Nuka Godtfredsen filmip imarisaanik ilusilersueqataassaaq. Kunuk Platou Christian Fleischer Rexilu filmilioqataasinnaasutut aamma taaneqarput , kalaallillu titartaallaqqissut arlallit aamma titartakkanik filmilioqataanissaminnut periarfissaqarput.