Oqaluffiup iluartuutitatut isigineqarnissaa sulissutigaat
Nunatsinni kristumiut oqaluffiat siulleq Qassiarsummiittoq Thjodhilde-p oqaluffia nunarsuarmiunut tamanut iluartuutitatut isigineqartussanngornissaa Gardar Foundation-imit sulissutigineqarpoq.
Gardar Foundationip Thjodhildep oqaluffianik manna tikillugu sulissutiginninniarnerigalua ajornakusoornerarneqarpoq siulersuisuni ilaasortaasut biskoppit arfineq-marluk tamarmik nunani assigiinngitsuni arfineq-marlunneersuunerat pissutaalluni.
- Siulersuisuni ilaasortaasut arfineq-marluk tamarmik nunani assigiinngitsuneersut ataatsimoortikkuminaatsorujussuupput, taama oqarpoq, Qassiarsunni savaatilik siulersuisuni ilaasortaq Erik Røde Frederiksen.
Siusinnerusukkut Gardar Foundationimiit ussassaarutigineqarpoq, siulersuisut kalaallinik amerlanerusunik ilaasortaqartinneqarnissaat, tamannalumi piviusunngorpoq.
Biskoppit pingasut USA-meersoq Nunavumeersoq Savalimmiuneersorlu siulersuisuniit tunuarmata nunatta katersugaasianeersumit aammalu Narsap katersugaasivianeersumit Igalikumilu nunaqarfiup aqutsisuineersumit kiisalu takornariartitsivilerisunit Destination South Greenlandimeersumit taarserneqarput.
Gardar Foundationimi anguniarneqarpoq, Tjodhildep oqaluffiata sullatsaalineqarnissaa taassumalu saniatigut aamma suliniaqatigiiffiup akisussaaffigaa Erik Aappalaartup illorsuatoqaa, taassumalu sullatsaalineqarnissaanut Narsap kommunia aningaasaliisuuvoq.
