Oqallittariaaseq nutaaq allanngortinneqassagunarpoq

Ukiaanerani ataatsimiinnermi misilittakkat aallaavigalugit tulliani ataatsimiinnissamut aaqqiisoqarnissaa, Inatsisartut siulittaasuata Josef Motzfeldtip eqqarsaatigaa.

Partiit sinnerlugit oqaaseqartartut ukiaanerani ataatsimiinnermi nutaarluinnarmik periuseqarput, tassa oqaluttarfimmukaqqaarlutik oqaaseqartaramik. Inatsisartunulli ilaasortat sinneri apeqquteqassagunik issiavimminniiginnartariaqartarput. Inatsisartunit ilaasortat tamarmik siusinnerusukkut oqaluttarfimmukaqqaarlutik apeqquteqarsinnaasarput.

Oqallinnerit sivikillineqarnissaat allanngortitsinermi siunertaagaluarpoq, kisianni ukiaanerani ataatsimiinnermi ammaanersiorneq pisarnermit sivisuneruvoq.

- Tamatumunnga suna pissutaanersoq oqaatiguminaappoq, periuseq nutaaq politikerit sungiukkuminaanneraat oqaatigiunminaappoq, Josef Motzfeldt oqarpoq.

Oqallittariaatsip allanngortinneqarnissaa Josef Motzfeldtip maanna eqqarsaatersuutigisussanngorpaa.

Inatsisartut upernaakkut ataatsimiinnerat Påskereertitsiarnerani, tassa apriilip ulluisa qulingiluaanni aallartissaaq.