Oqallittarfinnik nakkutilliinerit assigiinngillat

Oqaatsit sakkortuut, paquminarsinnaasulluunniit, inunnilluunniit ataatsiakkaanik malersuinertut nipillit, internetimi nittartakkani oqallittarfinni ilaatigut ilanngunneqartarput. Partiit ataasiakkaat nittartagaanni oqallittarfinnik nakkutilliinerit assigiinngillat. Atassutillu nittartagaani oqallinneq killeqannginnerpaamik ingerlanneqartarpoq.

Atassutip nittartagaani oqallittarfimmi oqaatsinik nikassaaniarpalaartunik atuisoqartarnera Demokraatinit naammagittaalliutigineqarpoq.

Demokraatit siulittaasuata Per Berthelsenip malersorneqarnissaa Atassutip nittartagaani oqallittarfimmi kajumissaarutigineqarpoq, ilaatigut oqaatsit imaattut oqallittarfimmi atorneqarsimapput; issuaaneq aallartippoq:

- Nalunngilarput inuttarsiuissanata, kisianni pineqarpata ikiaroornartut, inatsisinik unioqqutitsivoq, tamannalu inissisimaffiminit anisitaassutigisinnavaa. Qaa malersorniarsiuk, ullunimi kingullerni naalakkersuisoq malersorpaat. Misigilissuk qanoq innersoq, tassami iliuuseqalersinnatik imminnut qiviaqqaartariaqaraluaramik. Issuaaneq naavoq.

Nittartakkami oqallinnerup taamatut iluseqarluni saqqummersinneqarnera, ileqqorissaarnissamik uniuisoq, Demokraatineersoq Per Berthelsen isumaqarpoq, maannakkullu naammagittaalliuut Inatsisartut allattoqarfiani nalilersoqqullugu ingerlateqqissimavaa.

Atassutip nittartagaani oqallittarfimmi suulluunniit oqaaseriumasat kikkunnilluunniit allanneqarsinnaapput saqqummersinneqarlutillu. Aatsaat tamanit takuneqarsinnasutut saqqumereeraangata, oqaatsinik kusanaatsunik atuillutik allassimasunik piiaaneq pilersarpoq.

- Kikkulluunniit qanorluunniit oqaaseqarsinnaatillugit, sukkasuumik nittartakkani oqallissinnaneq inuit ornigineruaat, aamma Atassutip nittartagaani tamanna malunnarpoq. Atassutip partiiata allattaa, Jensine Berthelsen, oqarpoq, nangillunilu: - Ajoraluartumilli inoqarsinnaavoq kusanaatsumik siunertaqarlutik oqallittarfimmiittunik, taamaattoqartilluguli sapinngisarput tamaat oqaatsit kusanaatsut atorneqartut piiarniartarpavut. Oqarsinnaavugulli oqallittarfitsinni peqataasut 90 procentii politikki pillugu oqallittarmata, inoqatinillu nikassaasunik oqallinneq killilersimaarniartarparput, kiffaanngissuseqartumilli oqalinneq pingaartipparput allanngortikkusunngilarpullu, Atassutip partiiata allattaa Jensine Berthelsen naggasilluni oqarpoq.

Siumut, Kattusseqatigiit Partiiata Demokraatillu nittartagaanni oqallittarfinni ilanngukkusutat, inunnut aalajangersimasunut aqqusaaqqaarlutik nittartakkani oqallittarfinni oqaaseriumasat saqqummersinnaasarput.

Inuit Ataqatigiit nittartagaannut iserniaraanni oqallittarfimmilu ilanngussilluni, taava aatsaat isissutissamik peqaqqaarluni Inuit Ataqatigiit oqallittarfiani oqalliseqataasoqarsinnaavoq.

Inatsisartut allattoqarfiani pisortaq, Nikolaj Sørensen, oqarpoq, Demokraatit naammagittaalliutaata suliarineqarnera aqagu naammassineqarsimassasoq.