Oqallissaarisoq Kalaallit Illuutaanniissaaq

Tusagassiortup, oqallissaarisup assiliisuullu Jørgen Chemnitzip atuakkiaa nutaaq Københavnimi Kalaallit Illuutaanni ullumi ilisaritinneqassaaq.
Allattoq Mads Lynge
novembarip 06-at 2013 09:15

Atuagaq "Jørgen Chemnitz malillugu Kalaallit Nunaat" atuakkiortup atuartartutut AG-mut ukiuni kingullerni allagaataanik, aviisimullu immikkut inissillugu nassuiaatigisarsimasaanik imaqarpoq. Allaaserisimasat katillugit 45-t aqqutigalugit Kalaallit Nunaanni ajornartorsiutit immikkullu sammisat, soorlu oqaatsit pillugit oqallinneq, aalisarneq, aatsitassarsiorneq, namminiilivinnissaq pillugu oqallinneq ilinniartitaanerlu sammivai.

- Allaaserisat ilaatigut quianartortaqarput, quiasaarutaallutillu namminerlu isummanik saqqummersitsinerullutik, Kalaallit Illuutaat allappoq.

Jørgen Chemnitz atuakkamik aatsaat saqqummersitsinngilaq. Tassami Illoqqortorrmiuni innuttaasut tamarmik assileriarlugit "Assit, atiit"-imik taallugu atuakkamik 2009-mi saqqummersitsigami.

Atuagaq "Jørgen Chemnitz malillugu Kalaallit Nunaat" novembarip aallaqqaataani saqqummersinneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq