Oqallissaarisartoq danskinik ilaarsiinnarnermik unitsitseqqusivoq

Inuiaqatigiinni sanngiinnerpaat pineqarnerat eqqarsaatigalugu, inuiaqatigiit namminersortut danskinik ilaarsiiinnarunnaarlik. Danskeq imaaliallaannaq nipangertitassaanngitsoq taama kaammattuivoq:

- Aperisinnaavarma, sooq tamatumunnga akuliunnersunga. Akuliunnissara peqqutissarpassuaqarpoq. Aammami sunut akuliunnissara nammineq aalajangissavara, taava allat tusaarusunnerlutik ilaginnaannassanerlutilluunniit namminneq aalajangissavaat, atuakkiortoq oqallissaarisartorlu Tine Bryld oqarpoq.

Taassuma Kalaallit Nunaat sammeqqippaa. Atuagassiaq Social Kritik, kalaallisuuunngussaganni 'Isumagininnermik isornartorsiuineq'-mik taaneqarsinnaasoq, immikkut kalaallinik sammisaqarfiusoq aqagu saqqummissaaq.

Meeqqanik qanga pinngitsaalilluni aallartitsisarsimaneq, meeravissianngortitsisarsimaneq minnerunngitsumillu innarluutilinnik, tarnikkut nappaatilinnik eqqartuussaasimasunillu qanga maannalu Danmarkimut aallartitsisarneq sammineqarput.

- Tamakkua kalaallit nammineq oqallissigisariaqarpaat, aperalutik; innuttaaqatigut taama amerlatigisut aningaasarpassuit atorlugit Danmarkimut, nunamut allaalluinnartunut, tappavani piumasaasut malillugit katsorsartittassagutsigit eqqortuliornerua?

Isumaginninnermut naalakkersuisup Maliina Abelsenip ippassaq nassuerutigaa, Nunarput danskit aaqqiisimanerannik ilaarsiinnarani nammineq periaasissaminik ujarlertariaqartoq. Assersuutigaa, ilinniarsimasunik amigaateqarallarnermi sivikitsumik ilinniarsimasunit ileqqorissaarnikkut illersorneqarsinnaasumik inuiaqatigiinni ajornartorsiornerpaat sullinneqarnissaat neqeroorutigineqarsinnaasoq.

Tine Bryld ilisimaaraa, nammineq danskiugami danskit nunatsinni sunniuteqarujussuarsimaneranut ilisarnaatitut oqaatigineqarsinnaagami. Taamaattorli aammaarluni suaartaqqinnissamut pisussaasutut misigisimavoq. Ullutsinnimi unammilligassat kalaallisut aaqqinneqarsinnaapput. Danskilli kalaallillu tusarnaarnissaat piffissanngorpoq.

- Soorluuna suut tamarmik danskit eqqarsariaasiat malillugu suliarineqartartut. Taamaattumik aperivunga, allaanerusunik eqqarsariaaseqannginnami? Kalaallinik silatoorpassuarnik, aamma makkua pillugit eqqarsaasersortartunik, oqaloqateqartarpunga. Inuusuttut aperisut, sooruna taamaattoqartoq? Tassa oqallinnernut taamaattunut akuliutissallutik sungiusimanngilaat. Taamannak oqallinnissaq takornartarivaat, soorluttaaq uatsinnut takornartaasoq, atuakkiortoq oqallissaarisartorlu Tine Bryld oqarpoq.

Tine Bryldip Social kritik-ip immikkut saqqummersinneqarnera oqaluuseriartorlugu Nuummut sapaatit akunnerata tulliani tikissaaq.