Biskoppeqarfiup soraarsitsinermut tunngavilersuutaasut oqaatigerusunngilai.Assi: KNR

Oqallisaaqisoq: Markus E. Olsen palasiujunnaarpoq

Novembarip naaneraniit Markus E. Olsen palasitut suliunnaavissaaq, tungaanullu aamma sulissanngilaq, Nuummi biskoppeqarfik KNR-mut oqarpoq.

Oqaluuserineqaqisup palasip Markus E Olsenip suliunnaarallartinneqarnera maanna kiisami aalajangiivigineqarpoq.

Nuummi biskoppeqarfik KNR-mut oqarpoq, Markus E Olsen novembarip naanerani atorfimminiit soraassasoq.

- Ippassaq isumaqatigiissutigaarput, Markus E. Olsen novembarip naanerani atorfimminiit soraassasoq. Taavalu aamma novembarip naanissaata tungaanut sulingikkallassasoq, Biskoppip allaffiani pisortaq Marianne Hansen Heilmann KNR-mut oqarpoq

Taanna naapertorlugu, Markus E. Olsen peqatigiiffillu ilaasortaaffigisaa, Makkorsip soraartussanngornera pillugu isumaqatigiissutigineqarpoq

Pisoq naatsumik

Markus E. Olsen ippassaq tikillugu suliunnaarallartinneqarpoq.

Tamanna aamma isumaqarpoq, suliunnaarnisami tungaanut  sulissanngitsoq

Sermitsiaq naapertorlugu, ilagiit sinniisaat paasitinneqarsimanngillat sooq suliunnaarallartinneqarnersoq.

Tusarfiit tutsuiginartut naapertorlugit soraarsitsigallarneq pivoq, Markus E. Olsenip tamanna sioqqullugu oqaluffimmi qilaatersortitsisinnaanerluni apeqqutigeqqaarsimanngimmagu.

KNR-p sinerissami ilagiit sinniisai apersorpai taakkulu arlallit isumaqataanngillat

Suna tunngavilersuutaava?

- Isumaqatigiissutigaarput taamaallaat taamatut oqaaseqassasugut, allamik oqaasissaqanngilanga, Marianne Hansen Heilmann oqarpoq.

Qilaatersorneq kunngikkormiullu

Markus E. Olsen juunimi suliunnaarallartinneqarpoq inuiattut ullorsiornermi juunip 21-iani naalagiartitsereernermi kingorna.

Inuiattut ullorsiornermi Markus E. Olsen Nuummi Annaasisitta Oqaluffiani naalagiartitsivoq. Naalagiartitsinermi qilaatersortoqarpoq, aammalu naalagiartitsinermi malittareqqusaasut naapertorlugit kunngikkormiut naalakkersuisullu qinnunneqanngillat.

Tusarfiit tutsuiginartut naapertorlugit soraarsitsigallarneq pivoq, Markus E. Olsenip tamanna sioqqullugu oqaluffimmi qilaatersortitsisinnaanerluni apeqqutigeqqaarsimanngimmagu.

Pisoq maluginiarneqaqaaq, arlalippassuillu tamanna pillugu isummersuutigaat, ilaasa soraarsitsigallarneq inissaminiinngissoraat ilaasalu isumaqatigaat.

 - Taamarujuk kinguneqarnissaa naatsorsuutigisimanngikkaluarpara. Arlaatigut kinguneqartinneqassasoq soorunami naatsorsuutigisimavara. Kisianni taamarujuk, 1,2,3 oqaloqatiginninnertaqanngitsumik mianersoqqussummillu tunisinertaqanngitsumik isimmiinnarneqarnissara naatsorsuutigisimanngilara, taanna KNR-imut oqarpoq. 

Namminermi naalagiartitsinini qilaatersorneq eqqaassanngikkaanni ippinnartoqarsorinngikkaluarpaa.

Markus E. Olsen tamanna pillugu oqaaseqartinniaraluarparput oqaaseqarusunngilarli.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl