Oqallinnissamut periarfissiisoqarnissaa siunnersuutigaat

Kommunit nutaamik aaqqissuussaanissaannik suleqatigiissitat kommunit kattunnissaannik takorluugaat Nuup, Maniitsup Sisimiullu suleqatigiiffianit Fæko-mit suli isummerfigineqanngilaq, kisianni innuttaasut ukioq 2005 tamaat isumassarsiorfiginissaat siunnersuutigigaat Nuup Kommuneani borgmesteri Agnethe Davidsen oqarpoq.

Kommunit aaqqissuussaanerannik nalunaarutissaq ukiup affaa qaangiuppat naalakkersuisunut tunniunneqartussaavoq 2005-imi inatsisartunut akuerisassanngortinniarneqassalluni, kommunelli kitaani qiterliit isumaqarput oqallinnissamut piffissaq sivikippallaartoq.

Aamma 2005-imi kommuninut qinersineqarnissaa kommunalbestyrelsit nutaat aaqqissuussinissamut isummertinneqarnissaat isumaqarfigineqarpoq, innuttaasullu oqallisaaqataalluarnissaat eqqarsaatigalugu ukioq 2005 tamaat isumasiuinermut oqallinnermullu atortariaqaraluartoq inooqatigiinnut tamanut aaqqissuussinissaq annertoorujuussuarmik sunniuteqartussaajumaarmat Nuup borgmesteria Agnethe Davidsen oqarpoq.