Oqallinnerit kingullersaanni 65 millioni koruunit sammineqaqaat

Aningaasaqarnermut naalakkersuisoq, Palle Christiansen, sapaatip-akunnerisa siuliani oqaluttuarpoq, aappaagu aningaasanut inatsisissaq 12 millioni koruuninik sinneqartoorfiussasoq. Tasssami suliniutinut nutaanut atugassanik 65 millionit koruuninik nassaarsimagami. 40 millionit Nuummi Tuapannguani blokkersuit nutaat marluk tuninerigisut pissarsiarineqassapput, taava 25 millionit Namminersorlutik Oqartussat piginneqatigiiffiutaanni isertuussami pigisanik tunisinikkut pissarsiarinenqassallutik

Kisianni tamanna illua tungiliuttut uperiuminaatsippaat.

- Naalakkersuisooqatigiit oqarnikuugamik oqimaaqatigiissasoq. Tassa allamik nassaarneq sapileramik, 65 millionit tassanngaannaq ikkuppaat. Taamaasilluni aningaasanut inatsisissap oqimaaqatigiisinnissaa allaat sinneqartooruteqartutut isikkoqalerpoq. Kisianni tamanna piviusuunngitsutut isigivarput, Siumup aningaasaqarneq pillugu oqaaseqartartuaa, Finn Karlsen, oqarpoq.

Kisianni aningaasat 2011-mi pisarsiarinissaannut Palle Christiansen qulanngilaq.

Tuapannguani illorsuarnik tunisinikkut 40 millioni koruunit pissarsiassat siullermik

- Inissiat taakkua pilerinaqimmata, tuninissaat qularutigiinngilarput, Palle Christiansen oqarpoq.

Taava piginneqatigiiffimmik tunisinikkut 25 millionit pissarsiassat

- Naliliisitsigatta tassannga tunisinitsinnit qularutiginngilarput minnerpaamik 25 millionit pissarsiarissallugit.

Palle Christiansen misigisimavoq, isumaqatigiinniarnerni periarfissat takkukkut atornissaannut pisussaaffeqarluni .

- Soorunami illua tungiliuttut oqartussaapput, arraa aningaasat nassaarinerat sukkaq. Ilaannikkulli iluatsitsinartarpoq, taava iluatsitsineq akuersaarsinnaanngikkaanni imminut pisarissersorneruinnassaaq.

Inuit Ataqatigiit aningaasaqarneq pillugu oqaseqartartuat, Naaja Nathanielsen, isumakuluuteqanngilaq, aningaasanut inatsimmut akuersaassalluni, nalullugu 25 millionit suminngaannit pissarsiarineqassanersut.

- Naalakkersuisut tatigaakka, sulerinertik nalunngikkaat aammalu kisitsisit ilumoortut saqqummiukkaat.

Naaja Nathanielasen nangippoq.

- Piginneqatigiiffimmut, taassuma siulersuisuinut pisiumaartussanullu ataqqininnerussanngilaq, piginneqatigiiffimmik sorlermik tuniniaaniarnersugut mannangaaq saqqummiutissalllugu. Taamaaliornikkut aamma isertitassaagaluit ikinnerulersinneqarsinnaapput.

Aammali illua tungiliuttut paasilluarsinavai, isertuussinermik isornartorsiuimmata.

- Illua tungliuttut isornartunik ujarlertussapput. Eqqumiissagaluarporlu, illua tungiliuttut isornartorsiuinngippata. Paasilluarsinnaavakkalu taannarpiaq tikkuarmassuk, taannami immaqa pissutissaqarluartumik ersarlunnerpaavoq. Isumaqarpungalu allat tamarmik nassuiarluarneqartut, Naaja Nathanielsen oqarpoq .

Tassalu aappaagumut aningaasanut inatsisissaq IA-mit, Demokraatinit, Kattusseqatigiit Partiiannit Atassummillu akuersissutiginerqarpoq.