Oqallinneq: Hashi qanoq iliuuseqarfigissavarput?

Angut aterminik isertuusserusuttoq, ilaatigut tusagaqarfigissavarput. Taanna katsorsartissimagaluarpoq, maannali ikiaroornartumik atuisuulluni, taassumalu oqaatigaa ikiaroornartumik pissaqartilluni ulloq naallugu ikiaroorsinnaalluni.

- Ullutsinni toqutsisoqaraangat, apeqqutigineqartoq siulleq tassaakkajuttarpoq toqutsisoq imigassartorsimanersoq? Imigassarmi tassaavoq toqutsisoqartillugu pinngitsaaliisoqartillugu peqqutaanerpaasartoq, hashimik atuisoq aterminik isertuussiserusuttoq oqarpoq.

Hashimik ikiaroortartoq KNR-imit oqaloqatigisarput taama oqarpoq. Hashi imigassatuulli ajornartorsiutaatiginngitsoq taassuma aamma oqaatigaa.

Taamalu oqarnera aamma eqqortortaqarsinnaavoq. Tuluit Nunaannimi nakorsaatit pillugit atuagassiami The Lancetimi nalunaarusiami saqqummiunneqartumi oqaatigineqarmat imigassamik atornerluisuuneq, ikiaroornartumik atornerluisuunermut sanilliullugu qanigisaasunut inuiaqatigiinnullu pingasoriaammik sunniuteqarnerlunnerusartoq.

Tamannalu ilaatigut Oqalliffimmi oqallisigineqassaaq. Katsorsaavik Nuummi katsorsaanermut aqutsisoq Joori Lundblad, ilaqutariinnermut inatsisinillu atuutsitsinermut Naalakkersuisoq Martha Lund Olsen aamma politeeq Taitsiannguaq Fleischer oqallitsinneqassallutik.

Oqalliffik nalunaaqutaq qulinut aallartissaaq, qallunaatuualu aqqarnup qeqqa aallartissalluni. Tamatuma saniatigut KNR TV-kkut unnugu aamma takutinneqassalluni.

Oqalliffimmi aqutsisuussapput Arnaq Nielsen aamma Niels Søndergaard.